తెలంగాణ ప్రభుత్వం రైతు బంధు సాయం అందించేందుకు సిద్ధమైంది. యాసంగి సీజన్ కోసం ఈరోజు నుంచి రైతు బంధు సాయాన్ని అందచేయాలని రెండు రోజుల క్రితం నిర్ణయించింది. గతంలో చెక్కుల రూపంలో ఈ రైతు బంధు సాయం ఇచ్చే వారు కానీ ఈసారి నేరుగా రైతుల బ్యాంకు ఖాతాల్లో వేసేందుకు అధికారులు ఏర్పాట్లు చేశారు. ఇందు కోసం తెలంగాణ ప్రభుత్వం రూ.7,300 కోట్ల రూపాయలను విడుదల చేసింది.
ఈ రోజు నుండి జనవరి 7వ తేదీ వరకు విడతల వారీగా రైతు బంధు సొమ్మును అర్హులైన రైతుల ఖాతాల్లో జమ చేయనున్నారు. ముందుగా ఎకరం లోపు పొలం ఉన్న రైతుల ఖాతాల్లో రైతు బంధు సాయాన్ని జమ చేయనున్నారు. ఆ తర్వాత రెండెకరాల లోపు పొలం ఉన్న రైతుల ఖాతాల్లో డబ్బు జమ చేస్తారు. ఆపై మూడెకరాల లోపు పొలం ఉన్నవారి ఖాతాల్లో జమ చేసేలా ఏర్పాట్లు చేశారు. ఇలా విడతల వారీగా రైతులందరి ఖాతాల్లో నగదు జమ చేయనున్నారు.
