కిషన్ రెడ్డి మోదీ క్యాబినెట్ లో మంత్రా..? కేసీఆర్ ఫామ్ హౌస్ లో పాలేరా ? – ఎంపీ చామల

కేంద్రమంత్రి, బిజెపి రాష్ట్ర అధ్యక్షుడు కిషన్ రెడ్డి పై సంచలన వ్యాఖ్యలు చేశారు భువనగిరి ఎంపీ చామల కిరణ్ కుమార్ రెడ్డి. శనివారం గాంధీభవన్ లో ఆయన మీడియాతో మాట్లాడుతూ.. గత పది సంవత్సరాలలో బిఆర్ఎస్ చేయలేని అభివృద్ధిని సీఎం రేవంత్ రెడ్డి ఒక సంవత్సరంలోనే చేసి చూపిస్తుంటే, 9 సంవత్సరాలలో వారు తేలేని పెట్టుబడులను తెలంగాణ యువతకు ఉద్యోగాల కల్పన చేస్తుంటే,

ఇది చూసి ఓర్వలేక కడుపు మంటతో బీఆర్ఎస్ నాయకులు మాట్లాడుతుంటే, రేవంత్ రెడ్డి పైనే విమర్శలు చేస్తున్న కిషన్ రెడ్డి గులాబీ కళ్ళజోడు తీసేసి చూస్తే అన్నీ సజావుగా కనిపిస్తాయని అన్నారు ఎంపీ చామల. కిషన్ రెడ్డి మోడీ క్యాబినెట్ లో మంత్రా..? లేక కేసీఆర్ ఫామ్ హౌస్ లో పెద్ద పాలేరా..? అని తీవ్ర విమర్శలు చేశారు. కెసిఆర్ కాలికి ముళ్ళు గుచ్చుకుంటే కిషన్ రెడ్డి ఆయన నోటితో తీస్తా అనే విధంగా మాట్లాడుతున్నాడని మండిపడ్డారు.

కిషన్ రెడ్డి తెలంగాణ ప్రజలను తప్పుదోవ పట్టిస్తున్నాడని.. అభివృద్ధికి భిన్నంగా మాట్లాడితే సహించేది లేదన్నారు. దావోస్ వేదికగా రేవంత్ రెడ్డి రూ. 1,78,950 కోట్ల పెట్టుబడులు తీసుకువస్తే.. దానికి శుభం పలకరా పెళ్లి కొడకా అంటే.. పెళ్లికూతురు ముండ మోసిందట అనే సామెత మాదిరిగా కిషన్ రెడ్డి మాట్లాడుతున్నాడని దుయ్యబట్టారు. ఎవరో రాసి ఇచ్చిన స్క్రిప్ట్ ని ప్రెస్ మీట్ పెట్టి మాట్లాడడం సబబు కాదన్నారు.