తెలంగాణ అసెంబ్లీలో ముఖ్యమంత్రి రేవంత్ రెడ్డి డీ-లిమిటేషన్‌పై తీర్మానం ప్రవేశపెట్టారు. అనంతరం ఆయన ప్రసంగిస్తూ.. పునర్విభజన పారదర్శనకంగా జరగాలని డిమాండ్ చేశారు. జనాభా కాకుండా.. రాష్ట్రాన్నియూనిట్ గా తీసుకుని నియోజక వర్గ పునర్విభజన చేయాలని కోరారు. అయితే ఈ తీర్మానంపై బీజేఎల్పీ డిప్యూటీ ఫ్లోర్ లీడర్ పాయల్ శంకర్ స్పందించారు. శాసనసభలో డీలిమిటేషన్ పై చర్చిస్తామంటే అవకాశం ఇవ్వడం లేదని అన్నారు. దీనిపై కలిసి పోరాడతామని బీఆర్ఎస్, కాంగ్రెస్ అంటున్నాయని.. ఇప్పుడు కొత్తగా కలవడం ఏంటి.. ఆ రెండు పార్టీలు ఎప్పుడో కలిసిపోయాయని వ్యాఖ్యానించారు.
“మరికొన్ని రోజుల్లో తమిళనాడులో అసెంబ్లీ ఎన్నికలు జరగనున్నాయి. అందుకే ఆ రాష్ట్ర ముఖ్యమంత్రి స్టాలిన్ డీలిమిటేషన్ పై చర్చ మొదలుపెట్టారు. కానీ మన రాష్ట్రంలో ప్రస్తుతానికి ఎన్నికలేం లేవు. ఎన్నో సమస్యలు ప్రజలను పీడిస్తున్నాయి. ఇక్కడ ప్రజల కోసం పని చేయాల్సింది పోయి సీఎం రేవంత్ తమిళనాడుకు వెళ్లారు. డీలిమిటేషన్ వల్ల ఏ రాష్ట్రానికి అన్యాయం జరగదు. బీజేపీకి దేశంలోని అన్ని ప్రాంతాలు సమానమే. జిల్లాలను విభజించిన విషయం బీఆర్ఎస్ మరిచిపోయింది.” అని పాయల్ శంకర్ అన్నారు. ఇక అసెంబ్లీలో డీ లిమిటేషన్ పై ప్రవేశపెట్టిన తీర్మానాన్ని బీజేపీ వ్యతిరేకించింది.
