తెలంగాణ గ్రామీణ క్రీడా రంగాన్ని బలోపేతం చేయాలన్న లక్ష్యంతో తెలంగాణ ప్రభుత్వం చేపట్టిన సీఎం కప్ కి సంబంధించిన రాష్ట్ర స్తాయి పోటీలు రేపటి నుంచి జనవరి 02వ తేదీ వరకు కొనసాగనున్నాయి. తెలంగాణ స్పోర్ట్స్ అథారిటీ ఆధ్వర్యంలో పోటీలకు ఏర్పాట్లు చేసారు. మట్టిలో మాణిక్యాలను గుర్తించి వారి ప్రతిభకు ప్రోత్సాహం కల్పించాలన్న ఆశయంతో పాటు పల్లెల నుంచి ప్రపంచ ఛాంపియన్లను తీర్చిదిద్దాలన్న సంకల్పంతో తెలంగాణ ప్రభుత్వం ప్రతిష్టాత్మకంగా సీఎం కప్ 2024 క్రీడా పోటీలను నిర్వహిస్తుంది.
గ్రామ స్థాయి, మండల, జిల్లా స్థాయి పోటీలు పూర్తి కాగా.. డిసెంబర్ 27 నుంచి జనవరి 02 వరకు రాష్ట్ర స్థాయి పోటీలు జరుగనున్నాయి. పండుగ వాతావరణంలో జరుగనున్నాయని తెలంగాణ స్పోర్ట్స్ అథారిటీ శివ సేనా రెడ్డి తెలిపారు. ఈ పోటీలలో భాగంగా దాదాపు రెండు లక్షల మందికి పైగా క్రీడాకారుల సమాచారాన్ని గేమ్స్ మేనేజ్ మెంట్ సిస్టమ్ ద్వారా సంక్షిప్తం చేసారని.. క్రీడాకారులకు ఆధునిక సాంకేతిక పరిజ్ఞానంతో కూడిన సేవలు అందజేయడం, క్రీడలకు ఆధునిక సాంకేతిక హంగులు సమకూర్చడం.. రాబోయే తరానికి దిక్సూచిలా తెలంగాణ స్పోర్ట్స్ అథారిటీ కృషి చేస్తోందని తెలిపారు.
