పేదలు ఆత్మగౌరవంతో బతకాలనే ఉద్దేశంతో.. వాళ్లకూ సొంత గూడు కల్పించాలన్న ధ్యేయంతో తెలంగాణ రాష్ట్ర సర్కార్ అత్యంత ప్రతిష్ఠాత్మకంగా డబుల్ బెడ్ రూం ఇళ్ల పథకాన్ని ప్రారంభించింది. ఈ పథకంలో భాగంగా పేదలకు ఇళ్లను పంపిణీ చేస్తోంది. జీహెచ్ఎంసీ పరిధిలో ఇప్పటికే మొదటి విడతలో కొంత మందికి ఇళ్లు పంపిణీ చేసింది.
ఇక ఇవాళ జీహెచ్ఎంసీ పరిధిలో రెండో విడత డబుల్ బెడ్ రూమ్‌ ఇళ్ల పంపిణీకి ఉదయం 11 గంటలకు హైదరాబాద్ కలెక్టరేట్‌లో ఆన్లైన్ డ్రా తీయనున్నారు. ఎన్ఐసీ ఆధ్వర్యంలో రూపొందించిన ప్రత్యేక సాఫ్ట్‌వేర్ ద్వారా ర్యాండమైజేషన్ పద్ధతిలో మంత్రులు, ఉన్నతాధికారులు, లబ్దిదారుల సమక్షంలో డ్రా తీయనున్నారు. ఇందులో హైదరాబాద్, రంగారెడ్డి, మేడ్చల్ జిల్లాలకు చెందిన లబ్ధిదారులను ఎంపిక చేయనున్నారు.
గత నెల 24 వ తేదీన మొదటి విడతలో 11 వేల700 మంది లబ్ధిదారులను ఇదే పద్ధతిలో ఎంపిక చేసి ఈ నెల 2 వ తేదీన 8 ప్రాంతాలలో వారికి ఇళ్లను అందించారు. ఇవాళ 13 వేల 300 ఇళ్లకు నిర్వహించే ఆన్లైన్ డ్రాలో ఎంపికైన లబ్ధిదారులకు 21 వ తేదీన పురపాలక శాఖ మంత్రి కేటీఆర్ ఇళ్లను అందించనున్నారు. మరిన్ని విడతల్లో.. రెండు పడక గదుల ఎంపిక ప్రక్రియ కొనసాగించనున్నట్లు ప్రభుత్వ వర్గాలు ప్రకటించాయి.
