కొత్త కార్లను తరలిస్తున్న కంటైనర్ లో మంటలు చెలరేగి 8 కార్లు దగ్ధం అయ్యాయి. ఈ ఘటన సంగారెడ్డి జిల్లాలోని జహీరాబాద్ బైపాస్ లో చోటు చేసుకుంది. ముంబై నుంచి హైదరాబాద్ కు వస్తున్న కార్ల కంటైనర్ జహీరాబాద్ బైపాస్ పై వెళ్తుండగా.. ఒక్కసారిగా కంటైనర్లో నల్లటి పొగతో కూడుకున్న మంటలు చెలరేగాయి. ఇది గమనించిన డ్రైవర్ వెంటనే లారీని పక్కకు నిలిపి.. మంటలను ఆర్పే ప్రయత్నం చేశారు.
కానీ.. అప్పటికే పూర్తిగా మంటలు వ్యాప్తి చెందడంతో.. కంటైనర్ లో ఉన్న 8 కొత్త కార్లు పూర్తిగా దగ్ధం అయ్యాయి. కాగా ఈ అగ్ని ప్రమాదం గురించి సమాచారం అందుకున్న ఫైర్ సిబ్బంది హుటాహుటిన సంఘటనా స్థలానికి చేరుకొని.. మంటలను ఆర్పే ప్రయత్నం చేస్తున్నారు. అయితే మంటలు ఎగిసి పడుతుండటంతో.. భారీగా ట్రాఫిక్ జామ్ ఏర్పడింది. దీంతో రంగంలోకి దిగిన పోలీసులు.. ట్రాఫిక్
ను క్లియర్ చేసే పనిలో పడ్డారు.
