ఫ్లాషింగ్ లైట్స్, లౌడ్ మ్యూజిక్, వేడి నీళ్లు.. మూర్ఛను ప్రేరేపించే కారణాలు ఇవే!

మూర్ఛ (ఎపిలెప్సీ) అనగానే మనకు గుర్తొచ్చేది మెదడు సంబంధిత సమస్య మాత్రమే. కానీ, మన చుట్టూ ఉండే కొన్ని సాదాసీదా విషయాలు కూడా హఠాత్తుగా మూర్ఛ రావడానికి కారణమవుతాయని మీకు తెలుసా? ఫ్లాషింగ్ లైట్స్ చూడటం, పెద్ద శబ్దంతో మ్యూజిక్ వినడం లేదా ఆఖరికి వేడి నీళ్లతో స్నానం చేయడం వల్ల కూడా కొందరిలో మూర్ఛ సంభవించవచ్చని వైద్యులు హెచ్చరిస్తున్నారు. దీనిని ‘రిఫ్లెక్స్ ఎపిలెప్సీ’ అని పిలుస్తారు. దీని గురించి పూర్తి వివరాలు ఇప్పుడు తెలుసుకుందాం..

రిఫ్లెక్స్ ఎపిలెప్సీ అంటే ఏమిటి?: బాహ్య ప్రపంచంలో జరిగే కొన్ని మార్పులు మన శరీరంలో హఠాత్తుగా ఒక ప్రతిచర్యను ప్రేరేపిస్తాయి. ఇక దీనివల్ల మెదడులోని నరాల్లో అసాధారణ విద్యుత్ తరంగాలు ఉత్పత్తయి మూర్ఛ వస్తుంది. సాధారణంగా తరచూ మూర్ఛ సమస్యతో బాధపడేవారిలో ఈ ‘రిఫ్లెక్స్ ఎపిలెప్సీ’ ఎక్కువగా కనిపిస్తుంటుంది. మెదడు కొన్ని రకాల ప్రేరణలకు అతిగా స్పందించడమే దీనికి ప్రధాన కారణం.

వేడినీళ్ల స్నానం కూడా ప్రమాదకరమేనా?: చాలామందికి రోజూ బాగా వేడిగా ఉండే నీళ్లతో స్నానం చేయడం అలవాటు. కానీ, ఈ వేడి నీళ్లు తలపై పడినప్పుడు శరీర ఉష్ణోగ్రతలో హఠాత్తుగా మార్పులు వస్తాయి. ఈ మార్పును మెదడు తట్టుకోలేక కొందరిలో మూర్ఛను ప్రేరేపిస్తుంది. ఇక అందుకే ఫిట్స్ సమస్య ఉన్నవారు మరీ వేడిగా ఉండే నీళ్లతో కాకుండా గొర్రువెచ్చని నీళ్లతో స్నానం చేయడం మంచిదని వైద్యులు సూచిస్తున్నారు.

ఫ్లాషింగ్ లైట్లు, లౌడ్ మ్యూజిక్‌తో జాగ్రత్త: కన్సర్ట్‌లు, పబ్‌లు లేదా పండుగల్లో వాడే మిలమిల మెరిసే కాంతులు (లైటింగ్స్), టీవీలో వేగంగా మారే విజువల్స్, అలాగే హెడ్‌ఫోన్స్‌లో లేదా డీజేలలో వచ్చే పెద్ద శబ్దాలు (లౌడ్ మ్యూజిక్) కూడా మెదడుపై తీవ్ర ఒత్తిడిని పెంచుతాయి. ఇక ఇవి నాడీ వ్యవస్థను ప్రేరేపించి హఠాత్తుగా మూర్ఛ వచ్చేలా చేస్తాయి.

అరికట్టడానికి వైద్యుల సూచనలు: ఈ రకమైన మూర్ఛను కొన్ని జాగ్రత్తలు పాటించడం ద్వారా అరికట్టవచ్చు. ఎక్కువగా కాంతివంతమైన ప్రదేశాలకు, బిగ్గరగా ఉండే శబ్దాలకు దూరంగా ఉండాలి. ఇక సరైన సమయానికి నిద్రపోవడం, ఒత్తిడి తగ్గించుకోవడం మరియు డాక్టర్ సూచించిన మందులను వేళకు వేసుకోవడం వల్ల ఈ సమస్య నుంచి సురక్షితంగా బయటపడవచ్చు.

ఇక శరీరంలో మరియు చుట్టుపక్కల వాతావరణంలో జరిగే చిన్న చిన్న మార్పుల పట్ల అవగాహన కలిగి ఉండటం చాలా అవసరం. ఏ అంశాలు మూర్ఛను ప్రేరేపిస్తున్నాయో గుర్తించి జాగ్రత్త పడితే ఎలాంటి ప్రమాదం లేకుండా హాయిగా ఉండవచ్చు.

గమనిక: మీకు లేదా మీ కుటుంబ సభ్యులకు ఇలాంటి లక్షణాలు కనిపిస్తే వెంటనే న్యూరాలజిస్ట్‌ను (నరాల నిపుణుడిని) సంప్రదించి సరైన వైద్య సలహాలు, జీవనశైలి మార్పులను పాటించడం శ్రేయస్కరం.