భారీ వర్షాలు, ఎగువ నుంచి వస్తోన్న వరదల వల్ల శ్రీశైలం జలాశయం నిండుకుండలా మారింది. జలాశయంలోకి వరద ప్రవాహం అంతకంతకూ పెరగడంతో అధికారులు అప్రమత్తమయ్యారు. ప్రాజెక్టు గేట్లను ఎత్తి దిగువ ప్రాంతాలకు నీటిని విడుదల చేస్తున్నారు.
జూరాల, సుంకేసుల, హంద్రీ జలాశయాల నుంచి 2,26,361 క్యూసెక్కుల వరద నీరు శ్రీశైలం జలాశయానికి వచ్చి చేరుతోంది. దీంతో శ్రీశైలం ప్రాజెక్టు 5 గేట్లను పది అడుగుల మేర ఎత్తి 1,39,685 క్యూసెక్కుల నీటిని దిగువకు విడుదల చేస్తున్నారు.
శ్రీశైలం కుడి, ఎడమ జలవిద్యుత్‌ కేంద్రాల్లో విద్యుత్తు ఉత్పత్తి చేస్తూ 63,083 క్యూసెక్కుల నీటిని నాగార్జునసాగర్‌కు విడుదల చేస్తున్నారు. శ్రీశైలం జలాశయం పూర్తిస్థాయి నీటిమట్టం 885 అడుగులు కాగా.. శుక్రవారం మధ్యాహ్నం 12గంటల సమయానికి 884.70 అడుగులకు నీరు చేరినట్లు అధికారులు తెలిపారు.
ప్రాజెక్టు నీటి నిల్వ సామర్థ్యం 215.80 టీంఎంసీలు కాగా.. ప్రస్తుతం 213.88 టీఎంసీలు నీరు ప్రాజెక్టులో ఉన్నట్లు అధికారులు తెలిపారు. జలాశయం 5గేట్లు ఎత్తడంతో కృష్ణమ్మ పరవళ్లు చూసేందుకు సందర్శకులు తరలివస్తున్నారు.
