కాంగ్రెస్ పార్టీకి తెలంగాణ హైకోర్టు గుడ్ న్యూస్ చెప్పింది. రాష్ట్రంలో గ్రామ పంచాయతీ నిధుల గురించి ధర్నాచౌక్ వద్ద ఆ పార్టీ తలపెట్టనున్న ఆందోళన కార్యక్రమానికి హైకోర్టు గ్రీన్ సిగ్నల్ ఇచ్చింది. టీపీసీసీ కార్యనిర్వాహక అధ్యక్షుడి వేసిన పిటిషన్పై ఉన్నత న్యాయస్థానం ఉత్తర్వులు వెలువరించింది. ఇటీవల రాష్ట్ర ప్రభుత్వం ధర్నాకు అనుమతి నిరాకరించడాన్ని టీపీసీసీ సవాల్ చేస్తూ.. హైకోర్టులో పిటిషన్ దాఖలు చేసింది. దీనిపై లంచ్ మోషన్లో విచారణను స్వీకరించిన ధర్మాసనం.. తీర్పును వెలువరించింది.
గ్రామ పంచాయతీలకు నిధులపై తలపెట్టిన ధర్నాకు అనుమతిని మంజూరు చేస్తూ హైకోర్టు గ్రీన్ సిగ్నల్ ఇచ్చింది. ధర్నాచౌక్ వద్ద ధర్నాకు సంబంధించిన కొత్త తేదీలతో దరఖాస్తు చేసుకోవాలని టీపీసీసీకి తెలిపింది. ఈ ధర్నాలో పాల్గొనే వారు 300 మందికి మించి ఉండరాదని హైకోర్టు స్పష్టం చేసింది.
ఈనెల 2వ తేదీన గ్రామ పంచాయతీ నిధుల దారి మళ్లింపుపై టీపీసీసీ అధ్యక్షుడు రేవంత్రెడ్డి ధర్నాచౌక్ వద్ద ధర్నాలకు పిలుపునిచ్చిన సంగతి తెలిసిందే. కాంగ్రెస్ ధర్నా పిలుపుతో అప్రమత్తమైన పోలీసులు రాష్ట్రవ్యాప్తంగా ఉన్న కాంగ్రెస్ పార్టీ ముఖ్యనేతలను ముందస్తుగా గృహనిర్బంధం చేశారు.
