మరికొద్ది రోజుల్లో ప్రధాన మంత్రి నరేంద్ర మోదీ అగ్రరాజ్యంలో పర్యటించనున్నారు. అమెరికా కాంగ్రెస్ సంయుక్త సమావేశంలో ఆయన ప్రసంగించనున్నారు. వివిధ రంగాల్లో ఇరుదేశాల మధ్య సహకారంపై మోదీ, బైడెన్ చర్చించనున్నారు. ఈ పర్యటనలో భాగంగా మోదీకి బైడెన్ విందు ఇవ్వనున్నారు. జూన్ 22న అధికారిక డిన్నర్ కార్యక్రమం ఉంటుందని శ్వేతసౌధం తెలిపింది.
మరోవైపు మోదీ అమెరికా పర్యటన చరిత్రలో నిలిచిపోతుందని అమెరికా విదేశాంగ మంత్రి ఆంటోనీ బ్లింకెన్ పేర్కొన్నారు. ‘అమెరికా- ఇండియా బిజినెస్ కౌన్సిల్’ నిర్వహించిన ‘ఇండియా ఐడియాస్ సమిట్’ వార్షిక కార్యక్రమంలో పాల్గొన్న ఆయన.. ఇరుదేశాల మధ్య ఆర్థిక సంబంధాలు అత్యంత కీలకమని చెప్పారు.
“గతేడాది ఇరుదేశాల మధ్య వాణిజ్యం 191 బిలియన్ డాలర్లకు చేరుకుంది. భారత్కు అమెరికా అతిపెద్ద వాణిజ్య భాగస్వామిగా మారింది. అమెరికా కంపెనీలు భారత్లో 54 బిలియన్ డాలర్లు పెట్టుబడులు పెట్టాయి. భారత కంపెనీలు అమెరికాలో 40 బిలియన్ డాలర్లకు పైగా పెట్టుబడులు పెట్టాయి. త్వరలోనే ప్రధాని మోదీ చారిత్రక పర్యటన ఉంది. ఈ పర్యటన ఇరుదేశాల మధ్య బంధాన్ని మరింత బలోపేతం చేస్తుంది.”
– ఆంటోనీ బ్లింకెన్, అమెరికా విదేశాంగ మంత్రి
