హైదరాబాద్ లోని భ్రమరాంబ థియేటర్లో ఓ ప్రేక్షకుడిపై దాడి జరిగింది. ఈ తెల్లవారుజామున ఆది పురుష్ షో చూసేందుకు వచ్చిన ఆ వ్యక్తి హనుమంతుడికి కేటాయించిన సీట్లో కూర్చున్నాడు. దీంతో ఆగ్రహించిన కొందరు అతనిపై దాడి చేశారు. థియేటర్ సిబ్బంది వచ్చి గొడవ సర్దుమనిగేలా చూసి మరోచోట కూర్చోబెట్టారు. సీటులో కూర్చున్న వ్యక్తి మద్యం సేవించి ఉన్నట్లు ఫ్యాన్స్ తెలిపారు.
కాగా, ఆదిపురుష్ సినిమా ప్రదర్శించే థియేటర్లలో హనుమంతుడి కోసం ఒక సీటును కేటాయిస్తున్న విషయం తెలిసిందే. హనుమంతుడు వచ్చి సినిమా చూస్తాడు అనే నమ్మకంతో ఇలా ఒక సీటు విక్రయించకుండా వదిలేయాలని నిర్ణయించారు. అయితే ఈ సినిమా ప్రదర్శిస్తున్న ఓ థియేటర్లోకి ఓ వానరం వచ్చింది. కాసేపు స్క్రీన్ వైపు చూసి వెళ్ళిపోయింది. దీంతో హనుమంతుడు వచ్చి సినిమా చూశాడంటూ ప్రేక్షకులు జైశ్రీరామ్ అని నినాదాలు చేశారు.
