సంపూర్ణేశ్‌ బాబు.. జయాపజయాలతో సంబంధం లేకుండా సినిమాలు చేస్తూ.. కంటెంట్ లేకపోయినా తన కామెడీ టైమింగ్తో నవ్వించగలిగే నటుడు. ఆయన ప్రధాన పాత్రలో తెరకెక్కిన ‘మార్టిన్‌ లూథర్‌ కింగ్‌’ అక్టోబర్ 27వ తేదీన థియేటర్లలో విడుదలైన విషయం తెలిసిందే. పొలిటికల్ సెటైరికల్ జోనర్లో తెరకెక్కిన ఈ సినిమా ప్రేక్షకులను అలరించినా.. బాక్సాఫీస్ వద్ద మాత్రం పెద్దగా సత్తా చాటలేదు. అయితే ఈ సినిమా ఇప్పుడు ఓటీటీ రిలీజ్కు రెడీ అవుతోంది.
ప్రముఖ ఓటీటీ వేదిక ‘సోనీలివ్‌’ లో ఈ సినిమా ఈ నెల 29వ తేదీ నుంచి స్ట్రీమింగ్‌ కానున్నట్లు ఆ సంస్థ తన సోషల్ మీడియా ఖాతాల్లో వెల్లడించింది. తెలుగు, తమిళం, మలయాళం, కన్నడ, హిందీ ఆడియోలో ఈ చిత్రం అందుబాటులో ఉండనున్నట్లు తెలిపింది. కోలీవుడ్లో ఘన విజయం అందుకున్న ‘మండేలా’ కు రీమేక్‌గా రూపొందిందీ చిత్రం. ఇక్కడ నేటివిటీకి తగ్గట్లు కథలో మార్పులు చేసి దర్శకురాలు పూజ కొల్లూరు ఈ సినిమాను రూపొందించారు. ‘కేరాఫ్‌ కంచరపాలెం’ దర్శకుడు వెంకటేశ్‌ మహా ఈ సినిమాకు క్రియేటివ్‌ ప్రొడ్యూసర్‌గా వ్యవహరించారు. ఓటు విలువ చాటి చెప్పిన ఈ సినిమా ప్రస్తుతం తెలంగాణలో ఎన్నికల వేళ ఓటీటీలో సందడి చేయనుండటం గమనార్హం.
