మీరు ఆడపిల్లల తల్లితండ్రులైతే సుకన్య సమృద్ధి యోజన గురించి తప్పక తెలుసుకోవాలి. కేంద్ర ప్రభుత్వం ఆడపిల్లల కోసం అందిస్తున్న అద్భుతమైన పథకం ఇది. సుకన్య సమృద్ధి యోజన అనేది దేశంలోని బాలికల ఆర్థిక భవిష్యత్తును కాపాడేందుకు కేంద్ర ప్రభుత్వం ప్రారంభించిన పథకం. ఈ పథకంలో, తల్లిదండ్రులు లేదా సంరక్షకులు 10 సంవత్సరాల కంటే తక్కువ వయస్సు ఉన్న అమ్మాయి పేరు మీద ఖాతాను తెరవవచ్చు. ఈ పథకం 21 సంవత్సరాల తర్వాత మెచ్యూర్ అవుతుంది. 15 సంవత్సరాలు మాత్రమే పెట్టుబడి పెట్టవచ్చు. ప్రస్తుతం ఈ పథకానికి ప్రభుత్వం 8 శాతం వడ్డీ చెల్లిస్తోంది.
సుకన్య సమృద్ధి యోజనను కేంద్ర ప్రభుత్వం 2014లో ప్రారంభించింది. మహిళల అవసరాలను దృష్టిలో ఉంచుకుని ఈ పథకాన్ని రూపొందించారు. ఆడపిల్లల పేరిట ఒక ఖాతా మాత్రమే అనుమతించబడుతుంది. తల్లిదండ్రులు తమ ఇద్దరు కుమార్తెలకు మాత్రమే ఖాతా తెరవగలరు. అంటే ముగ్గురు ఆడపిల్లలున్న తల్లిదండ్రులు ఇద్దరి పేరుతో మాత్రమే ఖాతా తెరవగలరు. బ్యాంకులు లేదా పోస్టాఫీసుల ద్వారా సుకన్య సమృద్ధి యోజనలో చేరవచ్చు. అమ్మాయికి 18 ఏళ్లు వచ్చిన తర్వాత, పెట్టుబడి పెట్టిన మొత్తంలో 50 శాతం వరకు విత్‌డ్రా చేసుకోవచ్చు. 21 సంవత్సరాల వయస్సులో పూర్తి మొత్తాన్ని విత్‌డ్రా చేసుకోవచ్చు.
ఎలా దరఖాస్తు చేయాలి
మీరు కూడా ఈ పథకాన్ని పొందాలనుకుంటే, మీరు పోస్ట్ ఆఫీస్ లేదా బ్యాంక్ వెబ్‌సైట్ నుంచి సుకన్య సమృద్ధి యోజన దరఖాస్తు ఫారమ్‌ను డౌన్‌లోడ్ చేసుకోవాలి. ఈ ఫారమ్‌ను పూరించిన తర్వాత, మీరు మీ ఫోటోగ్రాఫ్, పిల్లల జనన ధృవీకరణ పత్రం, తల్లిదండ్రుల ID రుజువు మరియు ఇతర పత్రాలను అందించాలి. ఆ తర్వాత, సమీపంలోని బ్యాంక్ లేదా పోస్టాఫీసులో పత్రాలతో పాటు ఫారమ్‌ను సమర్పించండి. ఫారమ్ మరియు ఒరిజినల్ డాక్యుమెంట్లను ధృవీకరించిన తర్వాత, అమ్మాయి పేరు మీద ఖాతా ఓపెన్‌ అవుతుంది. దీని తర్వాత ఖాతాలో జమ చేయవచ్చు. సుకన్య ఖాతాలో ఒక సంవత్సరం లోపు డిపాజిట్ చేయకపోతే, ఖాతా స్తంభింపజేయవచ్చు. మార్చి 31 నాటికి, కనీస వార్షిక మొత్తాన్ని డిపాజిట్ చేయని అన్ని ఖాతాలు క్లోస్‌ అవుతాయి. ఖాతా తిరిగి ప్రారంభించడానికి పెనాల్టీ చెల్లించాల్సి ఉంటుంది.
