టాలీవుడ్ నటుడు సత్యదేవ్ రూటే సపరేటు. ఓ సినిమాలో హీరోగా కనిపిస్తాడు.. మరో మూవీలో విలన్ గా మెప్పిస్తాడు. ఇంకో చిత్రంలో క్యారెక్టర్ ఆర్టిస్టుగా మైమరపిస్తాడు. చేసే పాత్ర ఏదైనా తన నటనతో ప్రేక్షకులను మెస్మరైజ్ చేయడం మాత్రం కామన్. ఈసారి ఆయన హీరోగా కృష్ణమ్మ అనే మూవీ తెరకెక్కింది. వి.వి.గోపాల కృష్ణ ద‌ర్శ‌క‌త్వం వ‌హించిన ఈ చిత్రం నుంచి వారం కిందట థియేటర్ల లో రిలీజ్ అయింది.
అయితే..బాక్సాఫీస్ ముందు ఈ సినిమా నిలబడలేదు. దీంతో ఈ సినిమా ఓటీటీలోకి వచ్చేసింది. సత్యదేవ్ నటించిన రివెంజ్ డ్రామా కృష్ణమ్మ OTTలోకి ప్రవేశించింది. కృష్ణమ్మ అమెజాన్‌ ప్రైమ్ వీడియోలో ప్రసారం అవుతోంది. కాగా ఈ సినిమాలో లక్ష్మణ్ మీసాల, కృష్ణ, అర్చన, రఘు కుంచె, నందగోపాల్ కీలక పాత్రలు పోషించారు. కాల భైరవ స్వరాలు సమకూర్చారు. దర్శకుడు వి.వి. గోపాలకృష్ణ, స్టార్ డైరెక్టర్ కొరటాల శివ సమర్పణలో అరుణాచల క్రియేషన్స్ బ్యానర్‌పై కృష్ణ కొమ్మాలపాటి ఈ చిత్రాన్ని నిర్మించారు.
