భారత్‌తో నెలకొన్న ఉద్రిక్తతలు తీవ్ర రూపం దాల్చిన నేపథ్యంలో, పాకిస్థాన్ కీలక చర్యలు చేపట్టింది. ఇటీవల జమ్ము కశ్మీర్‌లోని పహల్గామ్‌లో జరిగిన ఉగ్రదాడిలో 26 మంది పౌరుల మరణంతో ఇరు దేశాల మధ్య సంబంధాలు మరింత దిగజారిన విషయం తెలిసిందే. ఈ నేపథ్యంలో, పాక్ ఆక్రమిత కశ్మీర్‌లోని గిల్గిత్, స్కార్డు నగరాలకు వెళ్లే అన్ని దేశీయ విమాన సర్వీసులను రద్దు చేస్తున్నట్లు బుధవారం పాకిస్థాన్ ప్రకటించింది.
జాతీయ గగనతల భద్రతను సమీక్షించిన అనంతరం ఈ నిర్ణయం తీసుకున్నట్టు పాక్ అధికారులు తెలిపారు. అదే సమయంలో, దేశంలోని ఇతర ఉత్తర ప్రాంతాలకు కూడా విమాన సర్వీసులను తాత్కాలికంగా నిలిపివేశారు. భారత్ మీదుగా వచ్చే అంతర్జాతీయ విమానాలకు సంబంధించి కఠిన నిఘా పెట్టాలని పౌర విమానయాన సంస్థ (CAA)కు పాక్ ప్రభుత్వం ఆదేశాలు జారీ చేసింది.
ఇతర చర్యలలో భాగంగా, పాక్ ఇప్పటికే భారత విమానయాన సంస్థలపై తమ గగనతలాన్ని మూసివేసింది. “నోటిస్ ఫర్ ఎయిర్‌మెన్” (NOTAM) విడుదల చేసి, వాణిజ్యంతో పాటు సైనిక, వీఐపీ విమానాలకు నెలరోజుల నిషేధం విధించింది.
ఇదిలా ఉండగా, పాక్ జాతీయ భద్రతా కమిటీ (NSC) అత్యవసరంగా సమావేశమై, భారత చర్యలకు ప్రతిస్పందనగా ఈ నిర్ణయాలను తీసుకుంటున్నట్టు వెల్లడించింది. వాఘా-అటారీ సరిహద్దు మూసివేత, పాక్ దౌత్యవేత్తల వెనుదిరోగమనానికి భారత్ తీసుకున్న నిర్ణయాలపై పాకిస్థాన్ కూడా కఠిన వైఖరి తీసుకుంటోందని సూచించింది.
అంతేకాక, అర్ధరాత్రి జరిగిన అత్యవసర మీడియా సమావేశంలో పాక్ సమాచార శాఖ మంత్రి అతవుల్లా తరార్ మాట్లాడుతూ, “భారత్ రాబోయే 24 నుంచి 36 గంటల్లో దాడికి పాల్పడే అవకాశం ఉంది” అని హెచ్చరించారు. ఈ వ్యాఖ్యలు ప్రస్తుత ఉద్రిక్త వాతావరణాన్ని స్పష్టం చేస్తున్నాయి.
