ఈ రోజు నవరాత్రి మహోత్సవాలలో ఐదవ రోజు. సిరిసంపదల మూలం, లోకమంతటికీ కరుణామూర్తి అయిన శ్రీ మహాలక్ష్మి అమ్మవారు ఈ దినాన తేజోమయమైన అలంకారంలో భక్తులకు దర్శనమిస్తారు. లోకకల్యాణానికి సిరిసంపదలకు మూలమైన ఆ తల్లిని దర్శించుకోవడం మహాభాగ్యం. అమ్మవారి ఈ అలంకారం కేవలం కంటికి మాత్రమే కాదు, మన మనస్సుకు కూడా శాంతిని, అదృష్టాన్ని అందిస్తుంది. ఈ దివ్యమైన రోజున మహాలక్ష్మిని స్మరించుకుందాం, ఆమె తేజోమయమైన కథలను తెలుసుకుందాం ..
నవరాత్రులలో ఐదవ రోజు సకల ఐశ్వర్యాల ప్రదాయిని అయిన శ్రీ మహాలక్ష్మి రూపంలో అమ్మవారు భక్తులకు దర్శనమిస్తారు. విజయవాడ ఇంద్రకీలాద్రిపై కొలువైన కనకదుర్గమ్మ ఈ రోజున మహాలక్ష్మీ తేజోమయ అలంకారంలో ప్రకాశిస్తారు. పట్టు వస్త్రాలు కాంతులీనే ఆభరణాలతో అలంకరించబడిన అమ్మవారి రూపం చూసే భక్తులకు కళ్ళు చెదరేంతటి తేజస్సును అందిస్తుంది.
పురాణాల ప్రకారం మహాలక్ష్మిని క్షీరసాగర మథనం సమయంలో ఉద్భవించిన దేవతగా పేర్కొంటారు. దేవతలు, రాక్షసులు అమృతం కోసం సముద్రాన్ని మథిస్తున్నప్పుడు అద్భుతమైన కాంతులతో, ఎర్రని తామర పువ్వుపై ఆసీనురాలై ఆమె ఉద్భవించింది. ఆమె రాకతోనే సృష్టికి సంపద, శుభం, శ్రేయస్సు లభించాయని పురాణాలు చెబుతాయి. విష్ణుమూర్తి వక్షస్థలంపై కొలువైన ఈ దేవి కేవలం ధనాన్ని మాత్రమే కాదు ధైర్యాన్ని జ్ఞానాన్ని, ఉన్నతమైన గుణాలను కూడా అనుగ్రహిస్తుంది.
ఈ రోజున అమ్మవారిని ఆరాధించడం వలన మనకు అష్టైశ్వర్యాలు చేకూరుతాయని ప్రతీతి. అష్టలక్ష్ములుగా పిలవబడే ఆ దేవి రూపాలు ఆదిలక్ష్మి, ధాన్యలక్ష్మి, ధైర్యలక్ష్మి, గజలక్ష్మి, సంతానలక్ష్మి విజయలక్ష్మి విద్యాలక్ష్మి, ధనలక్ష్మి మన జీవితంలోని ఎనిమిది ముఖ్యమైన అంశాలలో శుభాన్ని పరిపూర్ణతను అందిస్తాయని పురాణాలూ తెలుపుతున్నాయి.
మహాలక్ష్మీ తేజోమయ అలంకారంతో ప్రకాశించే అమ్మవారు మన జీవితాల నుండి అంధకారాన్ని దరిద్రాన్ని తొలగించి సిరిసంపదలతో నింపే శక్తిని కలిగి ఉంటారు. ఈ నవరాత్రి ఐదవ రోజున కేవలం ధనం కోసమే కాక మనసుకి శాంతి జ్ఞానం, దైవభక్తి వంటి ఉత్తమమైన సంపదలను ఇవ్వాలని కోరుకుంటూ అమ్మవారిని మనసారా పూజిద్దాం.
