గాఢమైన నిద్రలో ఉన్నప్పుడు ఒక్కసారిగా కాళ్లు లేదా చేతులు పట్టేయడం (Muscle Cramps) అనేది చాలా మందికి అనుభవమే. ఆ నొప్పి భరించరానిది కొన్ని క్షణాల పాటు తీవ్రమైన బాధను కలిగిస్తుంది. సాధారణంగా వీటిని ‘నైట్ టైమ్ లెగ్ క్రాంప్స్’ అని పిలుస్తారు. ఈ సమస్య ఎందుకు వస్తుంది? దీని వెనుక ఉన్న అసలు కారణాలు ఏమిటి? కేవలం వయస్సు పెరగడం వల్లనే కాకుండా మన జీవనశైలి మరియు శరీరంలోని కొన్ని ముఖ్యమైన పోషకాల అసమతుల్యత కూడా ప్రధాన పాత్ర పోషిస్తాయి. ఈ నొప్పిని తగ్గించుకోవడానికి ఎలాంటి జాగ్రత్తలు తీసుకోవాలో తెలుసుకుందాం.
నిద్రలో చేతులు, కాళ్లు పట్టేయడానికి (ముఖ్యంగా పిక్కలు) అనేక కారణాలు ఉన్నప్పటికీ, కొన్ని ప్రధానమైనవి.
నిర్జలీకరణం: శరీరంలో నీటి శాతం తగ్గడం (Lack of water) ప్రధాన కారణం. కండరాలు సరిగ్గా పనిచేయడానికి మరియు విశ్రాంతి తీసుకోవడానికి నీరు చాలా అవసరం. నిద్రపోయే ముందు తగినంత నీరు తాగకపోతే కండరాల కణాలు సరిగ్గా హైడ్రేట్‌ కావు, తద్వారా పట్టినట్లు అవుతాయి.
ఎలక్ట్రోలైట్ల అసమతుల్యత: మెగ్నీషియం (Magnesium), పొటాషియం (Potassium), మరియు కాల్షియం (Calcium) వంటి ముఖ్యమైన ఎలక్ట్రోలైట్‌లు కండరాలు సంకోచించడానికి, సడలడానికి సహాయపడతాయి. ఈ పోషకాలు శరీరంలో తగ్గినప్పుడు లేదా అసమతుల్యత ఏర్పడినప్పుడు, కండరాల నరాల సంకేతాలు (Nerve Signals) సరిగా అందక తిమ్మిర్లు (Spasms) వస్తాయి. మెగ్నీషియం లోపం అనేది నిద్రలో వచ్చే కండరాల పట్టడానికి ముఖ్య కారణంగా పరిగణిస్తారు.
కండరాల అలసట: పగటిపూట అధికంగా వ్యాయామం చేసినా లేదా ఎక్కువసేపు నిలబడి ఉన్నా కండరాలు బాగా అలసిపోతాయి. అలసిన కండరాలు నిద్రలో త్వరగా సడలలేవు, దాని ఫలితంగా అవి బిగుసుకుపోయి పట్టినట్లు అవుతాయి.
రక్త ప్రసరణ సమస్యలు: కొన్ని సందర్భాల్లో రక్త నాళాలు ఇరుకుగా మారడం వల్ల కాళ్లకు రక్త ప్రసరణ (Blood Flow) తగ్గుతుంది. ఇది కండరాలకు తగినంత ఆక్సిజన్ మరియు పోషకాలు అందకుండా చేస్తుంది, దీనివల్ల తిమ్మిర్లు వస్తాయి. ముఖ్యంగా వృద్ధులలో ఈ సమస్య అధికంగా ఉంటుంది.
నొప్పి తగ్గించుకోవడానికి చిట్కాలు: నిద్రపోయే ముందు కాళ్లు, చేతులకు తేలికపాటి సాగదీత వ్యాయామాలు (Stretching) చేయాలి. పగటిపూట మరియు రాత్రి పడుకునే ముందు తగినంత నీరు తాగాలి. మెగ్నీషియం (అవకాడో, నట్స్) పొటాషియం (అరటిపండు) అధికంగా ఉండే ఆహారాన్ని తీసుకోవాలి.
నిద్రలో కండరాలు పట్టేయడం అనేది తరచుగా జరిగితే అది అంతర్లీన ఆరోగ్య సమస్యకు సంకేతం కావచ్చు. సరైన హైడ్రేషన్ (Hydration) పాటించడం సమతుల్య పోషకాహారం (Balanced Diet) తీసుకోవడం, మరియు నిద్రపోయే ముందు తేలికపాటి వ్యాయామాలు చేయడం ద్వారా ఈ సమస్యను సమర్థవంతంగా తగ్గించుకోవచ్చు. ఆరోగ్యం పట్ల శ్రద్ధ వహిస్తే, నిశ్చింతగా నిద్రపోవచ్చు.
గమనిక: పైన ఇచ్చిన సమాచారం కేవలం అవగాహన కోసం మాత్రమే, మీకు తరచుగా తీవ్రమైన కండరాల తిమ్మిర్లు వస్తుంటే దయచేసి వైద్యుడిని సంప్రదించండి.
