కార్తీక మాసం.. శివకేశవుల అనుగ్రహానికి, అత్యంత పవిత్రమైన పూజలకు ప్రసిద్ధి. ఈ మాసంలో వ్రతాలు దీపారాధన, నదీ స్నానాలతో పాటు కొన్ని నియమ నిబంధనలు కచ్చితంగా పాటించాలి. ముఖ్యంగా పవిత్రతకు నిలయమైన కార్తీక మాసంలో ఆదివారం రోజున కొన్ని పనులు చేయడం అస్సలు మంచిది కాదని పెద్దలు చెబుతారు. మరి ఆ రోజున మనం తప్పక మానాల్సిన పనులు ఏమిటి? ఆధ్యాత్మిక పుణ్యం కోసం వాటిని ఎందుకు పాటించాలి? తెలుసుకుందాం..
ఆదివారం రోజు ఆహార నియమాలు: సాధారణంగా కార్తీక మాసం మొత్తం సాత్విక ఆహారం తీసుకోవడం ఉత్తమం. ఈ మాసంలో మాంసాహారం, మద్యం సేవించడం, తామస గుణం కలిగించే ఉల్లి, వెల్లుల్లి, గుమ్మడి కాయ వంటివి తినడం పూర్తిగా నిషేధం. అయితే కార్తీక ఆదివారం రోజున పాటించాల్సిన ప్రత్యేక నియమం ఒకటి ఉంది. అదేమిటంటే కొబ్బరి మరియు ఉసిరికాయ (ఆమలకం) తినకూడదని పండితులు సూచిస్తారు. ఉసిరిచెట్టును లక్ష్మీస్వరూపంగా, విష్ణుమూర్తి కొలువై ఉండే వృక్షంగా భావిస్తారు. సాధారణంగా కార్తీకంలో ఉసిరిచెట్టు కింద వనభోజనం చేసినా, ఆదివారం రోజు మాత్రం ఉసిరిని ఆహారంగా తీసుకోరాదని కొన్ని సంప్రదాయాలు చెబుతున్నాయి.
దీపారాధన మరియు తులసి నియమాలు: కార్తీక మాసంలో దీపారాధన చాలా ముఖ్యం. అయితే ఆదివారం రోజున ప్రత్యేకంగా పాటించాల్సిన విషయం ఏమిటంటే, తులసి దళాలను కోయడం చేయకూడదు. ఎందుకంటే తులసిని లక్ష్మీదేవి అంశగా భావిస్తారు. ఆదివారం రోజున, అలాగే ఏకాదశి రోజున కూడా తులసి దళాలను తుంచకూడదు. అలాగే, నలుగు పెట్టుకుని స్నానం చేయడం కూడా కార్తీక మాసంలో ముఖ్యంగా ఆదివారాలలో మానడం శ్రేయస్కరం.
కార్తీక మాసంలో పాటించే ప్రతి నియమం వెనుక ఆరోగ్యం, ఆధ్యాత్మిక చింతన, ప్రకృతి పట్ల గౌరవం వంటి గొప్ప అర్థాలు దాగి ఉన్నాయి. కార్తీక ఆదివారం రోజున నియమాలను పాటించడం ద్వారా శివ, కేశవుల అనుగ్రహంతో పాటు, సూర్యభగవానుడి ఆశీర్వాదం కూడా లభిస్తుందని నమ్మకం.
గమనిక: పైన ఇచ్చిన సమాచారం వివిధ ఆధ్యాత్మిక గ్రంథాలు, పండితుల సూచనల ఆధారంగా ఇవ్వబడింది. ఆచారాలు, సంప్రదాయాలు ప్రాంతాలను బట్టి మారవచ్చు. మీ వ్యక్తిగత విశ్వాసాలు మరియు పద్ధతులను అనుసరించగలరు.
