రాత్రి ఆలస్యంగా మేల్కొని టీవీ చూస్తున్నప్పుడు లేదా పని చేస్తున్నప్పుడు ఆకలి వేయడం సహజం. వెంటనే ఫ్రిజ్ తెరవడమో, చిప్స్ ప్యాకెట్ లాగించడమో చేస్తుంటాం. ఈ ‘మిడ్‌నైట్ స్నాక్స్’ (Midnight Snacks) రుచిగా ఉన్నప్పటికీ, నిజంగా ఇవి మన ఆరోగ్యానికి హాని చేస్తాయా? డాక్టర్లు మరియు పోషకాహార నిపుణులు ఈ అలవాటు గురించి ఏం చెబుతున్నారో, మన జీర్ణవ్యవస్థపై ఇది ఎలాంటి ప్రభావం చూపుతుందో తెలుసుకోవడం చాలా ముఖ్యం.
రాత్రిపూట జీర్ణక్రియ వేగం తగ్గుతుంది: సాధారణంగా, రాత్రి 7 లేదా 8 గంటల తర్వాత మన శరీరంలోని జీవక్రియ (Metabolism) మరియు జీర్ణక్రియ వేగం నెమ్మదిస్తుంది. దీనిని సిర్కాడియన్ రిథమ్ అంటారు. మనం రాత్రిపూట స్నాక్స్, ముఖ్యంగా అధిక కొవ్వు, చక్కెర, లేదా మసాలా పదార్థాలను తిన్నప్పుడు, జీర్ణవ్యవస్థ వాటిని సరిగ్గా జీర్ణం చేయడంలో ఇబ్బంది పడుతుంది. దీని ఫలితంగా ఎసిడిటీ ఛాతీలో మంట, కడుపు ఉబ్బరం వంటి సమస్యలు తలెత్తుతాయి. ఆహారం జీర్ణం కాకుండా ఉండటం వల్ల శరీరానికి తగిన విశ్రాంతి లభించక, నిద్రకు కూడా భంగం కలుగుతుంది.
దీర్ఘకాలిక ఆరోగ్య సమస్యలు: మిడ్‌నైట్ స్నాక్స్ తరచుగా తినడం అనేది కేవలం అజీర్తితో ఆగదు. డాక్టర్ల అభిప్రాయం ప్రకారం, ఈ అలవాటు దీర్ఘకాలంలో తీవ్రమైన ఆరోగ్య సమస్యలకు దారితీయవచ్చు. రాత్రిపూట అధిక క్యాలరీలు తీసుకోవడం వల్ల బరువు పెరగడం, ఊబకాయం వచ్చే ప్రమాదం ఉంది. అంతేకాకుండా ఇది రక్తంలో చక్కెర స్థాయిలను పెంచి, మధుమేహం (Diabetes) వచ్చే ప్రమాదాన్ని పెంచుతుంది. కొన్ని పరిశోధనల ప్రకారం, వేళాపాళా లేకుండా తినడం గుండె ఆరోగ్యం మరియు మెదడు పనితీరుపై కూడా ప్రతికూల ప్రభావాన్ని చూపవచ్చు, జ్ఞాపకశక్తి తగ్గిపోయే అవకాశం ఉందని నిపుణులు హెచ్చరిస్తున్నారు.
మిడ్‌నైట్ స్నాక్స్ తినడం పూర్తిగా మానేయలేక పోతే, ఆరోగ్యకరమైన ప్రత్యామ్నాయాలను ఎంచుకోవడం ఉత్తమం. అధిక నూనె లేదా చక్కెర ఉండే జంక్ ఫుడ్‌కు బదులుగా, నట్స్, పండ్లు (అరటిపండు), పాలు వంటి తక్కువ క్యాలరీలు, త్వరగా జీర్ణమయ్యే ఆహారాలను కొద్ది మొత్తంలో తీసుకోవచ్చు. రాత్రి భోజనం త్వరగా ముగించడం, సమతుల్య ఆహారం తీసుకోవడం ద్వారా అర్ధరాత్రి ఆకలిని నియంత్రించవచ్చు. మీ ఆరోగ్యానికి హాని చేసే అలవాటును మార్చుకుని, పడుకునే ముందు కనీసం రెండు గంటల ముందు భోజనం లేదా స్నాక్స్ ముగించడం మంచిది.
గమనిక: మీకు తరచుగా రాత్రిపూట అధిక ఆకలి అనిపిస్తే లేదా లేట్‌నైట్ ఈటింగ్ సిండ్రోమ్ (Night Eating Syndrome) లక్షణాలు కనిపిస్తే, ఆహార నియంత్రణ కోసం లేదా ఆరోగ్యకరమైన జీవనశైలి కోసం పోషకాహార నిపుణుడిని లేదా వైద్యుడిని సంప్రదించడం మంచిది.
