మనం బరువు తగ్గాలంటే కేవలం క్యాలరీలు లెక్కపెడితే సరిపోదని సైన్స్ చెబుతోంది. మనం ఏం తింటున్నాం అనే దానికంటే, ఎప్పుడు తింటున్నాం, ఎంత వేగంగా తింటున్నాం అనేది మన శరీరంపై ఎక్కువ ప్రభావం చూపుతుంది. క్యాలరీల లెక్కల కంటే మన జీవక్రియ (Metabolism) తీరును అర్థం చేసుకుని తినడమే నిజమైన స్మార్ట్ ఈటింగ్. దీనివల్ల ఆరోగ్యం మెరుగుపడటమే కాకుండా సులభంగా బరువు తగ్గవచ్చు. ఆ వివరాలు చూద్దాం..
టైమింగ్ చాలా ముఖ్యం: మనం తినే ఆహారం మన శరీరంలోని ‘బయోలాజికల్ క్లాక్’ (Circadian Rhythm) పై ఆధారపడి ఉంటుంది. ఉదయం పూట ఎక్కువ క్యాలరీలు తీసుకుని, రాత్రి తక్కువగా తినేవారు వేగంగా బరువు తగ్గుతారని పరిశోధనలు చెబుతున్నాయి. ఇక రాత్రి 9 గంటల తర్వాత స్నాక్స్ తింటే రక్తంలో చక్కెర స్థాయిలు పెరిగి గుండె జబ్బుల ముప్పు పెరుగుతుంది.
త్వరత్వరగా తినకండి.. ఆస్వాదించండి: చాలామంది భోజనాన్ని ఐదు నిమిషాల్లో ముగించేస్తారు. కానీ ఇలా చేయడం వల్ల మన కడుపు నిండిందనే సంకేతం మెదడుకు అందదు. మన శరీరంలో ఆకలిని తగ్గించే ‘GLP-1’ వంటి హార్మోన్లు విడుదల కావడానికి కనీసం 15 నుండి 30 నిమిషాల సమయం పడుతుంది. అందుకే నెమ్మదిగా నమిలి తింటే తక్కువ క్యాలరీలతోనే కడుపు నిండుతుంది.
అందరి శరీరం ఒకేలా ఉండదు: ఒకే రకమైన ఆహారాన్ని ఇద్దరు వ్యక్తులు తిన్నా, వారి శరీరాలు స్పందించే తీరు వేరుగా ఉంటుంది. మన కడుపులో ఉండే మైక్రోబ్స్ (సూక్ష్మజీవులు) మనం ఆహారాన్ని ఎలా అరిగించుకుంటామో నిర్ణయిస్తాయి. అందుకే పక్కవారి డైట్ ప్లాన్ మనకు పని చేయకపోవచ్చు.
స్నాక్స్ విషయంలో జాగ్రత్త: మనం రోజూ తీసుకునే శక్తిలో నాలుగో వంతు స్నాక్స్ నుండే వస్తుంది. చిరుతిళ్లు ఎప్పుడు పడితే అప్పుడు కాకుండా, సరైన సమయంలో తింటేనే ప్రయోజనం.ఇకపోతే ముఖ్యంగా భోజనానికి, భోజనానికి మధ్య గ్యాప్ తగ్గించడం లేదా పెంచడం వల్ల శరీరంలోని కొవ్వు శాతాన్ని తగ్గించుకోవచ్చు.
బరువు తగ్గడం అనేది కేవలం తక్కువ తినడం కాదు, తెలివిగా తినడం. సరైన సమయంలో, నెమ్మదిగా, పోషకాలున్న ఆహారాన్ని తీసుకోవడమే ఆరోగ్యకరమైన జీవితానికి రహస్యం.
గమనిక: ఈ సమాచారం పరిశోధనల ఆధారంగా ఇవ్వబడింది. మీ ఆహారపు అలవాట్లలో పెద్ద మార్పులు చేసే ముందు నిపుణుల సలహా తీసుకోవడం ఉత్తమం.
