ఉదయం టిఫిన్ నుండి రాత్రి డిన్నర్ వరకు మన వంటల్లో నూనె లేనిదే ముద్ద దిగదు. రుచి కోసం మనం నూనెను భారీగా వాడేస్తున్నాం కానీ, అది మన ఆరోగ్యాన్ని ఎంతలా దెబ్బతీస్తుందో గమనించడం లేదు. అసలు రోజుకు ఎంత నూనె వాడాలి? అతిగా వాడితే వచ్చే నష్టాలేంటి? ఆరోగ్యంగా ఉండటానికి నిపుణులు చెబుతున్న లెక్కలేంటో ఇప్పుడు వివరంగా తెలుసుకుందాం.
అసలు లెక్క ఎంత?: మన భారతీయులు ఏడాదికి సగటున 23.5 లీటర్ల నూనె వాడుతున్నారని సర్వేలు చెబుతున్నాయి. కానీ ఐసీఎంఆర్ (ICMR) ప్రకారం, ఒక మనిషి రోజుకు 20 మిల్లీలీటర్లు.. అంటే కేవలం నాలుగు టేబుల్ స్పూన్ల నూనె మాత్రమే వాడాలి. మీ ఇంట్లో నలుగురు ఉంటే, నెలకు 2.5 నుండి గరిష్ఠంగా 4 లీటర్ల నూనె మాత్రమే వాడటం ఉత్తమం. ఆ పైన వాడితే మీరు ప్రమాదంలో ఉన్నట్లే!
నూనె అవసరమే.. కానీ పరిమితంగా: వంటల్లో నూనె అసలు వాడకపోవడం కూడా మంచిది కాదు. ఎందుకంటే శరీరానికి కావాల్సిన ఏ, డి, ఈ, కె వంటి విటమిన్లను మన శరీరం గ్రహించాలన్నా, ఫిజికల్ వర్క్ చేయడానికి శక్తి కావాలన్నా నూనె అవసరం. కానీ అది పరిమితి లోపు ఉన్నప్పుడే మనకు మేలు చేస్తుంది. ఏదైనా సరే హద్దు దాటితే మన ఆరోగ్యానికే చేటు చేస్తుంది.
అతిగా వాడితే గుండెకు చేటు: నూనె అధికంగా తీసుకోవడం వల్ల రక్తనాళాల్లో పూడికలు (Blockages) ఏర్పడే ప్రమాదం ఉంది. దీనివల్ల ఊబకాయం, రక్తపోటు (BP) పెరగడమే కాకుండా నేరుగా గుండె జబ్బులకు దారితీస్తుంది. షుగర్ వంటి దీర్ఘకాలిక వ్యాధులు కూడా మనం వాడే అధిక నూనె వల్లే వస్తున్నాయని జాతీయ వైద్య పరిశోధనా సంస్థలు హెచ్చరిస్తున్నాయి.
ఆరోగ్యకరమైన మార్పులు చేసుకోండి: వంటల్లో నూనె తగ్గించాలంటే డీప్ ఫ్రైలను తగ్గించి, గ్రిల్డ్ లేదా స్టీమ్డ్ ఫుడ్స్కు ప్రాధాన్యత ఇవ్వాలి. ఒకే నూనెను మళ్లీ మళ్లీ మరిగించి వాడటం వల్ల అందులో క్యాన్సర్ కారకాలు పెరుగుతాయి. కాబట్టి వాడే నూనె విషయంలో ఆచితూచి అడుగు వేయడం చాలా అవసరం. చిన్న మార్పులతో పెద్ద అనారోగ్య సమస్యల నుండి తప్పించుకోవచ్చు.
రుచి కంటే ఆరోగ్యమే ముఖ్యం. మనం వాడే నూనె డబ్బాలను బట్టి మన ఆయుష్షు ఆధారపడి ఉంటుందని గుర్తుంచుకోండి. నేటి నుండే మీ వంటగదిలో నూనె వాడకాన్ని తగ్గించి, మీ కుటుంబ సభ్యుల ఆరోగ్యాన్ని కాపాడండి.
గమనిక: మీ వయస్సు, చేసే పని (శారీరక శ్రమ), మరియు ఆరోగ్య స్థితిని బట్టి నూనె అవసరం మారుతుంది. మీకు ఏవైనా గుండె సంబంధిత సమస్యలుంటే, మీ డాక్టర్ సూచించిన డైట్ ప్లాన్ను మాత్రమే అనుసరించండి.
