నాగ్‌ అశ్విన్‌ దర్శకత్వంలో పాన్ ఇండియా స్టార్ ప్రభాస్ నటిస్తోన్న సైన్స్‌ ఫిక్షన్‌ థ్రిల్లర్‌ ‘కల్కి 2898 ఏడీ’. ఈ సినిమాను మే 9వ తేదీన విడుదల చేస్తామని చిత్రబృందం ప్రకటించిన విషయం తెలిసిందే. అయితే ఈ సినిమా రిలీజ్ డేట్ వాయిదా పడుతుందంటూ నెట్టింట కొన్నిరోజులుగా వార్తలు చక్కర్లు కొడుతున్నాయి. తాజాగా ఈ చిత్రంలో నటిస్తున్న బాలీవుడ్ బిగ్బీ అమితాబ్ బచ్చన్ సోషల్ మీడియాలో పెట్టిన ఒక్క పోస్టుతో ఆ రూమర్స్కు చెక్ పడినట్లు అయింది.
‘‘కల్కి’ షూటింగ్‌ నుంచి ఇంటికి వచ్చేసరికి రాత్రి మళ్లీ ఆలస్యమైంది. ఈ చిత్రీకరణ పనులు దాదాపు పూర్తయ్యాయి. ముందుగా చెప్పిన సమాచారం ప్రకారమే మే 9న విడుదల కానుంది. ప్రేక్షకులకు మర్చిపోలేని అనుభూతిని ఇవ్వడానికి ఎంతోమంది కష్టపడి పని చేస్తున్నారు’ అని తన బ్లాగ్‌లో రాసుకొచ్చారు. దీంతో ఈ సినిమా విడుదల విషయంలో మరోసారి క్లారిటీ వచ్చింది. ఇందులో ప్రభాస్ భైరవగా కనిపించనున్నారు. ఆయనకు జోడీగా దీపికా పదుకొణె నటిస్తుండగా.. దిశా పటానీ, అమితాబ్ బచ్చన్, కమల్‌ హాసన్‌, రాజేంద్రప్రసాద్‌ కీలక పాత్రలు పోషిస్తున్నారు.
