బాలీవుడ్ స్టార్ హీరో సల్మాన్ ఖాన్కు మరోసారి బెదిరింపులు ఎదురయ్యాయి. చావుకు వీసా అక్కర్లేదంటూ దుండగులు సల్మాన్కు బెదిరింపు లెటర్ రాశారు. అయితే ఈసారి ఫేస్బుక్ మాధ్యమంగా ఈ వార్నింగ్ వచ్చింది. దీంతో ముంబయి పోలీసులు అప్రమత్తమయ్యారు. సల్మాన్ను అప్రమత్తం చేసి బందోబస్తు ఏర్పాటు చేశారు. భాయిజాన్కు మళ్లీ బెదిరింపులు రావడంతో ఆయన కుటుంబంతో పాటు అభిమానులు ఆందోళన చెందుతున్నారు. ఆయన క్షేమంగా ఉండాలని ప్రార్థనలు చేస్తున్నారు.
అసలేం జరిగిందంటే.. గ్యాంగ్స్టర్ లారెన్స్ బిష్ణోయ్ పేరిట ఉన్న ఫేస్బుక్ అకౌంట్ నుంచి.. సల్మాన్ ఖాన్కు డెత్ థ్రెట్ వచ్చింది. భాయిజాన్తో పాటు ఈ పోస్టులో పంజాబీ సింగర్ జిప్పీ గ్రేవాల్కు కూడా వార్నింగ్ ఉంది. జిప్పీని ఉద్దేశిస్తూ.. “నువ్వు సల్మాన్ ఖాన్ను సోదరుడిగా భావిస్తావు. ఇప్పుడు నీ అన్న వచ్చి నిన్ను కాపాడాల్సిన సమయం వచ్చింది. ఈ మెసేజ్ నీకు మాత్రమే కాదు. సల్మాన్ ఖాన్కు కూడా. దావూద్ వచ్చి కాపాడతాడని ఊహల్లో ఉండకు. నిన్ను సేవ్ చేయడానికి ఎవరూ రారు. సిద్ధూ మూసేవాలా మరణంపై నువ్వు, ఎలా స్పందించావో మేము చూశాం. ఈ బెదిరింపు ట్రైలర్ లాంటిదే. అసలు సినిమా ముందుంది. నువ్వు ఏ దేశానికైనా వెళ్లు.. కానీ, మరణానికి వీసా అవసరం లేదు” అని పోస్టులో రాసి ఉంది. ఈ ఖాతాకు లారెన్స్ ఫొటోనే డీపీగా ఉందటంతో అది ఒరిజినల్ ఖాతానా లేక ఫేక్ అకౌంటా అనే విషయంపై పోలీసులు ఆరా తీస్తున్నారు.
