టాలీవుడ్ హీరోయిన్లు కాజల్‌ అగర్వాల్, రెజీనా ప్రధాన పాత్రల్లో కార్తికేయన్‌ (డీకే) తెరకెక్కించిన తమిళ సినిమా ‘కరుంగాపియం’. ‘కార్తీక’ పేరుతో గతేడాది జులైలో తెలుగులో రిలీజ్ అయింది. ఇప్పటికే అమెజాన్‌ ప్రైమ్‌ వేదికగా తమిళంలో స్ట్రీమింగ్‌ అవుతోంది. అయితే ఈ సినిమా ఇప్పుడు తెలుగు ప్రేక్షకులను అలరించేందుకు వచ్చేస్తోంది. ప్రముఖ తెలుగు ఓటీటీ వేదిక ఆహాలో ఏప్రిల్‌ 9వ తేదీ నుంచి ఈ మూవీ స్ట్రీమింగ్‌ కానుంది. ఈ విషయాన్ని తెలియజేస్తూ ఆహా కొత్త పోస్టర్‌ను పంచుకుంది.
కార్తీక స్టోరీ ఇదే : కార్తీక (రెజీనా).. కాలక్షేపం కోసం ఓ పాత లైబ్రరీకి వెళ్తుంది. అక్కడ ఆమెకు వందేళ్ల క్రితం రాసిన ‘కాటుక బొట్టు’ అనే పుస్తకం కనిపిస్తుంది. పురాతన గ్రంథంలా కనిపించిన ఆ పుస్తకాన్ని చూసిన వెంటనే ఆమెకు చదవాలనిపిస్తుంది. అయితే, ఆమె పుస్తకంలో చదివే పాత్రలన్నీ దెయ్యాలుగా మారి ఒక్కొక్కటిగా తన ముందుకు వస్తుంటాయి. అలా, ఆమె ముందుకు వచ్చిన ఓ పాత్ర కార్తీక (కాజల్‌). గ్రామస్థుల వల్ల మరణించిన కార్తీక పగ, ప్రతీకారాలతో రగిలిపోతుంటుంది. మరి, ఆమె పగ ఎలా తీరింది..? కార్తీక (రెజీనా), కథలో ఉన్న కార్తీక (కాజల్‌)కు ఉన్న సంబంధం ఏమిటి..? తెలియాలంటే సినిమా చూడాల్సిందే.
