2009లో విడుదలై అన్నివర్గాల ప్రేక్షకులను అలరించడమే కాదు.. కలెక్షన్ల వర్షం కురిపించిన సినిమా త్రీ ఇడియట్స్. రాజ్‌ కుమార్‌ హిరాణీ దర్శకత్వంలో ఆమిర్‌ ఖాన్, శర్మన్ జోషి, మాధవన్‌ నటించిన ఈ సినిమా అంటే నచ్చని వారుండరు. ఈ మూవీ ఇప్పటికే ఇతర భాషల్లోనూ రీమేక్ అయి.. అంతే ఆదరణ పొందింది. అయితే తాజాగా ఈ సినిమా సీక్వెల్పై నటుడు శర్మన్ జోషి ఓ గుడ్ న్యూస్ చెప్పారు. ‘త్రీ ఇడియట్స్’ సినిమాలో రాజు పాత్రతో అలరించిన శర్మన్ జోషి ఇటీవల ఓ ఇంటర్వ్యూలో పాల్గొన్నారు.
‘‘త్రీ ఇడియట్స్ సినిమాకు సీక్వెల్ ఉంటుంది. సీక్వెల్ తెరకెక్కితే అది కచ్చితంగా ప్రేక్షకులను మరింత ఆకట్టుకుంటుంది. రాజ్‌కుమార్‌ హిరాణీ కూడా దీనిపై ఎంతో ఆసక్తిగా ఉన్నారు. ఈ సినిమా సీక్వెల్ కోసం ఎంతోమంది ఎదురుచూస్తున్నారు. వాళ్లను నిరాశపరచడం ఆయనకు ఇష్టంలేదు. దీనికి సంబంధించిన కొన్ని ఆలోచనలను ఆయన నాతో పంచుకున్నారు. దీని సీక్వెల్ కచ్చితంగా ప్రేక్షకులకు రెట్టింపు ఉత్సాహాన్నిస్తుంది’’ అని చెప్పారు.
