ప్రస్తుతం ప్రపంచ వ్యాప్తంగా మహేశ్ బాబు, ఎస్ఎస్ రాజమౌళి సినిమా కోసం ఎంతో ఆసక్తిగా ఎదురుచూస్తున్నారు. SSMB29 ప్రాజెక్టు నుంచి ఎప్పుడు అప్డేట్ వస్తుందా అని కళ్లు కాయలు కాచేలా చూస్తున్నారు. అయితే తాజాగా మహేశ్ బాబు ఫ్యాన్స్కు జక్కన్న ఓ క్రేజీ అప్డేట్ ఇచ్చాడు. ప్రస్తుతం జపాన్లో తన లాస్ట్ గ్లోబల్ హిట్ మూవీ రౌద్రం రణం రుధిరం(RRR Movie) స్క్రీనింగ్కు హాజరైన రాజమౌళి అక్కడే స్టేజ్ మీద మహేశ్తో చేయబోయే సినిమాకు సంబంధించి మాట్లాడారు.
ఈ సినిమాకు సంబంధించి స్క్రిప్ట్ వర్క్ కంప్లీట్ అయి ప్రీ ప్రొడక్షన్ పనులు జరుపుకుంటోందని తెలిపాడు. కాస్టింగ్ ఇంకా కంప్లీట్ కాలేదని, కేవలం హీరో మాత్రమే లాక్ అయ్యారని, అతడే మహేశ్ బాబు అని చెప్పాడు. మహేశ్ తెలుగు హీరో, చాలా హ్యాండ్సమ్గా ఉంటారు, మీలో చాలా మందికే తెలిసే ఉండొచ్చు అని జపాన్ ప్రేక్షకులకు పరిచయం చేశాడు. సాధ్యమైనంత వరకు ఈ చిత్రాన్ని త్వరగా పూర్తి చేసి ఇక్కడ కూడా రిలీజ్ చేస్తామన్న జక్కన్న అప్పుడు మహేశ్ను ఇక్కడికి తీసుకొస్తానంటూ చెప్పుకొచ్చాడు.
