విశాఖపట్నంలోని రామానాయుడు స్టూడియోకు నోటీసులు జారీ అయ్యాయి. రెండు వారాల సమయం ఇస్తామని, వారి వివరణ తర్వాత చర్యలు ఉంటాయని జిల్లా కలెక్టర్ ఎంఎన్ హరేంద్రర ప్రసాద్ తెలిపారు. రామానాయుడు స్టూడియోకు చిత్ర నిర్మాణ పరిశ్రమ, స్టూడియో నిర్మాణం కోసం ప్రభుత్వం 34 ఎకరాలకు పైగా భూమిని కేటాయించిందని.. అందులో 15.17 ఎకరాలు హౌసింగ్‌ లేఅవుట్‌ కోసం మార్పు చేయాలని స్టూడియో యాజమాన్యం కోరిందని తెలిపారు. అది నిబంధనలకు విరుద్ధమని.. నోటీసులు ఇవ్వాలని ప్రభుత్వం నిర్ణయించినట్లు చెప్పారు.
రామానాయుడు స్టూడియోకు కేటాయించిన భూములను నివాస స్థలాలుగా మార్పు చేయాలని తలపెట్టిన 15.17 ఎకరాల భూ కేటాయింపు రద్దు చేయాలని ఇటీవల రాష్ట్ర ప్రభుత్వం కీలక నిర్ణయం తీసుకున్న విషయం తెలిసిందే. నిర్దేశించిన ప్రయోజనం కోసం ఇచ్చిన భూమిని అప్రయోజనం కోసం వినియోగిస్తే రద్దు చేయాలని సుప్రీంకోర్టు తీర్పు ఇచ్చింది. ఈ తీర్పు ప్రకారం.. రెవెన్యూ శాఖ ప్రత్యేక ప్రధాన కార్యదర్శి ఆర్‌.పి. సిసోదియా ఉత్తర్వులు జారీ చేయడంతో తాజాగా జిల్లా కలెక్టర్ నోటీసులు ఇచ్చారు.
