షుగర్ ఉన్నవారు చికెన్ తినాలా? మటన్ తినాలా? నిపుణుల సలహా

మధుమేహం (Diabetes) ఉన్నవారు ఆహారం విషయంలో ఎన్నో జాగ్రత్తలు తీసుకోవాల్సి ఉంటుంది. ముఖ్యంగా మాంసాహారం తినేటప్పుడు చికెన్ మేలా? లేక మటన్ మేలా? అనే సందేహం చాలామందిలో ఉంటుంది. రక్తంలో చక్కెర స్థాయిలు పెరగకుండా గుండె ఆరోగ్యానికి ముప్పు లేకుండా మాంసాహారాన్ని ఎలా ఆస్వాదించాలో తెలియక చాలామంది దీనికి దూరంగా ఉంటారు. అయితే సరైన రకాన్ని సరైన పద్ధతిలో ఎంచుకుంటే షుగర్ ఉన్నవారు కూడా నిరభ్యంతరంగా మాంసాహారాన్ని భుజించవచ్చు. ఆ వివరాలేంటో ఇప్పుడు చూద్దాం.

చికెన్ మరియు మటన్, ఏది సురక్షితం?: డయాబెటిస్ ఉన్నవారికి చికెన్ (ముఖ్యంగా చికెన్ బ్రెస్ట్) అత్యుత్తమ ఎంపిక అని నిపుణులు చెబుతున్నారు. చికెన్ ఒక ‘లీన్ ప్రోటీన్’ వనరు అంటే ఇందులో కొవ్వు తక్కువగా, ప్రోటీన్లు ఎక్కువగా ఉంటాయి. ఇది రక్తంలో చక్కెర స్థాయిలను వేగంగా పెంచదు. దీనికి విరుద్ధంగా మటన్ (రెడ్ మీట్)లో శాచురేటెడ్ ఫ్యాట్స్ (కొవ్వులు) ఎక్కువగా ఉంటాయి.

ఇవి శరీరంలో ఇన్సులిన్ నిరోధకతను పెంచడమే కాకుండా గుండె సంబంధిత సమస్యలకు దారితీసే ప్రమాదం ఉంది. మటన్ కంటే చికెన్ సులభంగా జీర్ణమవడమే కాకుండా శరీర బరువును నియంత్రణలో ఉంచడానికి కూడా సహాయపడుతుంది. కాబట్టి డయాబెటిస్ రోగులు మటన్ కంటే చికెన్ లేదా చేపలకు ప్రాధాన్యత ఇవ్వడం ఎంతో శ్రేయస్కరం.

వండే విధానంలో తీసుకోవాల్సిన జాగ్రత్తలు: మాంసం ఏదైనా సరే దానిని ఎలా వండుతున్నామనేది ముఖ్యం. చికెన్ తిన్నా కూడా దానిని నూనెలో డీప్ ఫ్రై చేయడం లేదా మసాలాలు దట్టించి ‘చికెన్ 65’ వంటివి చేసుకోవడం వల్ల లాభం కంటే నష్టమే ఎక్కువ. షుగర్ ఉన్నవారు మాంసాన్ని ఉడికించిన (Boiled), కాల్చిన లేదా తక్కువ నూనెతో కూరలా చేసుకుని తినడం మంచిది.

అలాగే, చికెన్ వండేటప్పుడు పైన ఉండే చర్మాన్ని తొలగించాలి, ఎందుకంటే అందులోనే ఎక్కువ కొవ్వు ఉంటుంది. మటన్ తినాలనిపిస్తే నెలలో ఒకటి రెండు సార్లు మాత్రమే చాలా తక్కువ పరిమాణంలో, కొవ్వు లేని ముక్కలను ఎంచుకోవడం ఉత్తమం.

జాగర్తలు : డయాబెటిస్ నియంత్రణలో ఉండాలంటే కేవలం మందులు మాత్రమే సరిపోవు, మనం తినే పళ్ళెంలో ఉండే ఆహారం కూడా అంతే ముఖ్యం. చికెన్ లేదా చేపలను వారానికి రెండు సార్లు మితంగా తీసుకోవడం వల్ల శరీరానికి అవసరమైన పోషకాలు అందుతాయి. మటన్ వంటి రెడ్ మీట్‌ను వీలైనంత వరకు తగ్గించడం వల్ల దీర్ఘకాలంలో గుండె మరియు కిడ్నీ ఆరోగ్యాన్ని కాపాడుకోవచ్చు. ఏదైనా మితంగా తింటేనే అది మనకు ఔషధంలా పనిచేస్తుంది.

గమనిక: పైన పేర్కొన్న సమాచారం కేవలం సాధారణ అవగాహన కోసం మాత్రమే. మీ రక్తంలోని చక్కెర స్థాయిలు మరియు ఇతర ఆరోగ్య పరిస్థితులను బట్టి మీ డైటీషియన్ లేదా వైద్యుని సలహా మేరకు మాత్రమే ఆహార మార్పులు చేసుకోండి.