బ్రెష్ చేసుకునేటప్పుడు లేదా ఏదైనా పండు తింటున్నప్పుడు చిగుళ్ల నుండి రక్తం రావడం గమనించారా? చాలామంది దీనిని చిన్న విషయంగా భావించి వదిలేస్తుంటారు. కానీ ‘గమ్ బ్లీడింగ్’ అనేది కేవలం దంతాల సమస్య మాత్రమే కాదు అది మీ లోపల ఉన్న ఇతర ఆరోగ్య సమస్యలకు శరీరం ఇచ్చే ఒక హెచ్చరిక కావచ్చు. చిగుళ్లలో వాపు రక్తం రావడం వెనుక ఉన్న అసలు కారణాలేంటి మరియు వాటిని ఎలా అధిగమించాలో తెలుసుకుందాం.
చిగుళ్ల నుండి రక్తం రావడానికి ప్రధాన కారణాలు: చిగుళ్ల నుండి రక్తం రావడానికి అత్యంత సాధారణ కారణం ‘జింజివైటిస్’ (Gingivitis). దంతాల మధ్య సరిగ్గా శుభ్రం చేయకపోవడం వల్ల ఏర్పడే బ్యాక్టీరియా పొర (Plaque) చిగుళ్లను బలహీనపరుస్తుంది. దీనివల్ల చిగుళ్లు ఎర్రబడటం, వాపు రావడం జరుగుతుంది.
ఇది కాకుండా శరీరంలో విటమిన్-C మరియు విటమిన్-K లోపం ఉన్నప్పుడు కూడా చిగుళ్ల రక్తస్రావం జరుగుతుంది. అలాగే, గర్భధారణ సమయంలో హార్మోన్ల మార్పుల వల్ల, కొందరు అతి వేగంగా గట్టిగా బ్రెష్ చేయడం వల్ల కూడా చిగుళ్లు దెబ్బతిని రక్తం రావచ్చు. దీనిని నిర్లక్ష్యం చేస్తే దంతాలు వదులైపోయే ప్రమాదం ఉంది.
శరీర అంతర్గత ఆరోగ్యానికి సంకేతం: గమ్ బ్లీడింగ్ అనేది కొన్నిసార్లు దంతాల సమస్య కంటే పెద్దదైన అనారోగ్యానికి సూచికగా మారుతుంది. రక్తహీనత, డయాబెటిస్, లేదా రక్తానికి సంబంధించిన కొన్ని తీవ్రమైన సమస్యలు ఉన్నప్పుడు కూడా చిగుళ్ల నుండి రక్తం కారుతుంది. మధుమేహం ఉన్నవారిలో ఇన్ఫెక్షన్లను ఎదుర్కొనే శక్తి తక్కువగా ఉండటం వల్ల చిగుళ్ల సమస్యలు త్వరగా వస్తాయి.
కాబట్టి, చిగుళ్ల నుండి రక్తం రావడం నిరంతరం కొనసాగుతుంటే, అది కేవలం దంతవైద్యుడి వద్దకే కాకుండా, పూర్తి శారీరక పరీక్ష అవసరమనే విషయాన్ని గుర్తించాలి. శరీరంలోని రోగనిరోధక శక్తి తగ్గినప్పుడు కూడా ఇలాంటి లక్షణాలు కనిపిస్తాయి.
నివారణ మార్గాలు మరియు జాగ్రత్తలు: చిగుళ్ల ఆరోగ్యాన్ని కాపాడుకోవడానికి రోజుకు రెండుసార్లు మృదువైన బ్రెష్తో శుభ్రం చేసుకోవడం అలవాటు చేసుకోవాలి. పోషకాహారం, ముఖ్యంగా సిట్రస్ పండ్లు (నిమ్మ, నారింజ) తీసుకోవడం వల్ల విటమిన్ లోపాలను అధిగమించవచ్చు. ఉప్పు నీటితో పుక్కిలించడం వల్ల చిగుళ్లలోని బ్యాక్టీరియా నశిస్తుంది.
గమనిక: చిగుళ్ల నుండి రక్తం రావడం వారానికి పైగా కొనసాగినా, లేదా నోటి నుండి దుర్వాసన వస్తున్నా వెంటనే దంతవైద్యుడిని (Dentist) సంప్రదించండి.
