తల్లిదండ్రులు పిల్లలను ఎంతో ప్రేమతో పెంచుతారు మరియు పిల్లలను మంచి మార్గంలో నడిపించాలని ఆశిస్తారు. కాకపోతే, వారికి తెలియకుండానే పిల్లలను గారాభం చేయడం లేదా కఠినంగా ప్రవర్తించడం వంటివి చేస్తారు. పిల్లలను క్రమశిక్షణ తో పెంచడం వలన వారు మంచి స్థాయికి ఎదుగుతారు. కనుక తల్లిదండ్రులు కొన్ని ముఖ్యమైన చిట్కాలను పాటించడం ద్వారా పిల్లల భవిష్యత్తును మరింత మెరుగుపరచవచ్చు. పిల్లలు ఎదుగుతున్న సమయంలో, తల్లిదండ్రులు కొన్ని విషయాలలో స్వేచ్ఛను ఎక్కువగా ఇస్తూ ఉంటారు. అయితే ప్రతి విషయంలో స్వేచ్ఛ ను ఎక్కువగా ఇవ్వడం వలన క్రమశిక్షణ దెబ్బతినే అవకాశం ఉంది. ఇది పిల్లల భవిష్యత్తు పై మరింత ప్రమాదకరంగా మారవచ్చు.
పిల్లల్లో పాజిటివిటీ ఎంతో అవసరం. ఏ పని చేసినా దాన్ని పూర్తి చేయగలము అనే ధైర్యం అవసరం. ఈ విధంగా నడుచుకుంటే జీవితంలో విజయాలను పొందగలుగుతారు. కనుక, పిల్లలకు పాజిటివిటీ గురించి చెప్పడం చాలా అవసరం. పిల్లలు చిన్నప్పటి నుంచే ఇతరులకు సహాయం చేసే గుణాన్ని అలవాటు చేసుకోవాలి. చిన్న వయసు నుంచే స్వార్థంతో పెరిగితే, భవిష్యత్తులో వారు ఇతరులకు సహాయం చేయరు. సహాయం చేసే గుణాన్ని అలవాటు చేసుకోవడం వలన లీడర్షిప్ లక్షణాలు పెరుగుతాయి. అలాగే ఎటువంటి స్వార్థం లేకుండా జీవితాన్ని కొనసాగించగలుగుతారు.
పిల్లలు తప్పు చేసినప్పుడు అనవసరంగా కోపంలో అరవకుండా ప్రశాంతంగా వారికి చెప్పాలి. ఓర్పుతో నేర్పించడం వలన వారు పొరపాటును మళ్లీ చేయకుండా ఉంటారు. పిల్లలకు ఇంట్లో చిన్న చిన్న పనులను అప్పగించడం వలన వారికి బాధ్యత పెరుగుతుంది. అలాగే పని చేయడం నేర్చుకుంటారు. పిల్లలు చదువుతో పాటు ఇటువంటి బాధ్యతలను తీసుకోవడం వలన పట్టుదల, కృషి వంటి లక్షణాలు పెరుగుతాయి. చిన్న వయసులోనే బాధ్యత గురించి అవగాహన కలుగుతుంది. అదేవిధంగా ఎటువంటి ఇబ్బందులు వచ్చినా ధైర్యంగా స్వీకరించాలనే విషయాన్ని నేర్పించాలి.
