ఏపీలో ఓ సూపర్ ఫాస్ట్ రైలుకు త్రుటిలో ప్రమాదం తప్పింది. రైల్వే సిబ్బంది వెంటనే అప్రమత్తం కావడంతో పెను ప్రమాదం తప్పినట్లయింది. విశాఖ – విజయవాడ జన్మభూమి సూపర్‌ఫాస్ట్ విశాఖలోనే నిలిచిపోయింది. ఉదయం 6 గంటల 20 నిమిషాలకు రైలు బయల్దేరింది. కాగా బయల్దేరిన 2 నిమిషాలకే ఏసీ బోగీ లింక్‌ తెగిపోయింది. 2 బోగీలను స్టేషన్లోనే వదిలి జన్మభూమి సూపర్ ఫాస్ట్ ముందుకెళ్లింది.
వెంటనే అప్రమత్తమైన సిబ్బంది రైలును విశాఖ స్టేషన్‌కు తిరిగి తీసుకొచ్చారు. సాంకేతిక సమస్యతో 2 బోగీలు రైలు నుంచి విడిపోయినట్లు రైల్వే అధికారులు తెలిపారు. సమస్యను పరిష్కరించాక రైలును పంపిస్తామని వెల్లడించారు. రైలు ఆలస్యంతో ప్రయాణికులు 2-3 గంటలుగా స్టేషన్లోనే ఇబ్బందులు పడుతున్నారు. దాదాపు 3 గంటల నుంచి రైల్వే స్టేషన్లోనే వేచి చూస్తున్నామని ప్రయాణికులు వాపోతున్నారు. తమ గమ్యస్థానానికి అనుకున్న సమయానికి చేరలేకపోతున్నామని ఆందోళన వ్యక్తం చేస్తున్నారు. వీలైనంత త్వరగా తమ ప్రయాణానికి అధికారులు ఏర్పాట్లు చేయాలని కోరుతున్నారు.
