ఆంధ్రప్రదేశ్ ముఖ్యమంత్రి వైఎస్ జగన్మోహన్ రెడ్డి కీలక ఆదేశాలు జారీ చేశారు. మహిళా శిశు సంక్షేమ శాఖలో ఉన్న ఖాళీలను వెంటనే భర్తీ చేయాలని ఆదేశించారు సీఎం జగన్. మహిళా అభివృద్ధి, శిశు సంక్షేమంపై ఆయన సమీక్ష జరిపారు. ఈ సమీక్షలో ఖాళీగా ఉన్న అంగన్వాడీ వర్కర్లు, అంగన్వాడీ హెల్పర్ పోస్టులను వెంటనే భర్తీ చేయాలన్నారు. సంపూర్ణ పోషణ కింద పంపిణీ ప్రక్రియకు సంబంధించి సమర్థవంతమైన ఎస్ఓపి రూపొందించాలన్నారు.
క్రమం తప్పకుండా అంగన్వాడీలపై పర్యవేక్షణ జరగాలని సూచించారు. అలాగే అంగన్వాడీలలో నాడు – నేడు పనులపై ఆరా తీశారు సీఎం జగన్. ప్రతి అంగన్వాడీలో చేపట్టాల్సిన పనులపై ప్రతిపాదనలు తయారు చేసి తనకు నివేదిక ఇవ్వాలని సూచించారు. అలాగే అంగన్వాడీలలో పిల్లల ఎదుగుదలను పర్యవేక్షించే పరికరాలను కూడా ఉంచుకోవాలని నిర్దేశించారు.
