ఏపీలో గ్రూప్-2 మెయిన్స్ పరీక్ష ఫలితాలు విడుదలయ్యాయి. ఈ ఏడాది ఫిబ్రవరి 23న నిర్వహించిన మెయిన్స్ పరీక్ష ఫలితాలను ఏపీపీఎస్సీ విడుదల చేసింది. 905 గ్రూప్-2 ఉద్యోగాల నియామకానికి మెయిన్స్ పరీక్ష నిర్వహించారు. ధ్రువపత్రాల పరిశీలనకు 1:2 నిష్పత్తిలో అభ్యర్థులను ఎంపిక చేశారు. స్పోర్ట్స్ సహా సాధారణ కోటాలో 2,517 మంది అభ్యర్థులను ఎంపిక చేశారు.
వీరందరికీ ధ్రువపత్రాలను తనిఖీ చేసే తేదీలను కాల్ లెటర్ల ద్వారా తెలియజేయనున్నట్లు అధికారులు తెలిపారు. గ్రూప్-2 ఉద్యోగ నియామకాల్లో రోస్టర్ పాయింట్ల అంశంపై కేసు హైకోర్టులో పెండింగ్‌లో ఉంది. హైకోర్టు తీర్పునకు లోబడి తుది నియామక ప్రక్రియ చేపట్టనున్నట్లు ఏపీపీఎస్సీ స్పష్టం చేసింది. ఫలితాలతో పాటు మెయిన్ పరీక్ష ఫైనల్ కీని ఏపీపీఎస్సీ వెబ్‌సైట్‌లో పొందుపరిచినట్లు అధికారులు తెలిపారు.
