సత్తెనపల్లి వైసీపీ ఎమ్మెల్యే అంబటి రాంబాబు అక్రమ మైనింగ్ చేస్తున్నారంటూ రాజుపాలెం వైకాపా కార్యకర్తల తరపున హైకోర్టులో ప్రజా ప్రయోజన వ్యాజ్యం (పిల్) దాఖలైంది. వారి తరపున హైకోర్టు న్యాయవాది రఘు ఈ పిటిషన్ దాఖలు చేశారు. ఈ కేసు విచారణను వచ్చే నెలకి వాయిదా వేసింది కోర్టు. పిటిషన్ విచారణ అర్హత మీద కోర్టు కొన్ని ప్రశ్నలు లేవనెత్తింది. అక్రమ మైనింగ్ జరుగుతున్నందుకే పిటిషన్ వేశానని పిటిషనర్ పేర్కొన్నారు.
అయితే దీనిలో రాజకీయ దురుద్దేశం ఉందని ప్రభుత్వ న్యాయవాది వాదించారు. దీంతో కేసును వచ్చే నెలకి వాయిదా వేసింది కోర్టు. రాజుపాలెం మండలం కోట నెమిలిపురి, కొండమోడులో అక్రమ మైనింగ్ జరిగిందని ఆ పిటిషన్ లో ఆరోపించారు. ఈ విషయమై కలెక్టర్ , మంత్రి పెద్దిరెడ్డి రామచంద్రారెడ్డి, సీఎం జగన్ కు ఫిర్యాదులు పంపినా పట్టించుకోలేదని ఆరోపించారు. ఇప్పటికే మైనింగ్ అధికారులు విచారణ జరిపారని పిటిషనర్లు పేర్కొన్నారు.
