కూటమి ప్రభుత్వం కొలువుదీరాక అసెంబ్లీ మొదటి సమావేశానికి సర్వం సిద్ధమైంది. కాసేపట్లో ఈ సమావేశాలు ప్రారంభం కానున్నాయి. ఇప్పటికే ప్రొటెం స్పీకర్‌గా ప్రమాణం చేసిన సీనియర్‌ ఎమ్మెల్యే గోరంట్ల బుచ్చయ్య చౌదరి ప్రొటెం స్పీకర్‌ హోదాలో సభాపతి స్థానంలో ఆశీనులై కొత్తగా ఎన్నికైన ఎమ్మెల్యేలందరితో ప్రమాణం చేయించనున్నారు.
ఉదయం 9 గంటల 46 నిమిషాలకు సభ ప్రారంభం అవుతుంది. వెంటనే అసెంబ్లీ కార్యదర్శి ప్రొటెం స్పీకర్‌ గోరంట్ల బుచ్చయ్య చౌదరిని సభాపతి స్థానానికి ఆహ్వానించగా.. సభాపతి స్థానంలో కుర్చున్న తరువాత తొలుత సభానాయకుడైన ముఖ్యమంత్రి చంద్రబాబు చేత ప్రమాణం చేయిస్తారు. ఆ తరువాత వరుసగా ఉప ముఖ్యమంత్రి, మంత్రులు, ఎమ్మెల్యేలు ప్రమాణం చేయనున్నారు.
గంటకు సగటున 25 మంది సభ్యుల ప్రమాణం చొప్పున 7 గంటల పాటు ఈ ప్రక్రియ సాగనున్నట్లు ప్రభుత్వ వర్గాలు తెలిపాయి. తొలిరోజే దాదాపు సభ్యులందరి చేత ప్రమాణం చేయించే అవకాశం ఉన్నట్లు వెల్లడించాయి. వివిధ కారణాల వల్ల ఎవరైనా తొలిరోజు సభకు రాలేకపోయినా, ప్రమాణం చేయలేకపోయినా వారితో శనివారం ఉదయం సభ తొలి సెషన్లో ప్రమాణం చేయిస్తారని సమాచారం.
