కడప జిల్లా జమ్మలమడుగు వద్ద గండికోటలో ప్రముఖ నటుడు కమలహాసన్ సందడి చేశారు. కమలహాసన్ తాజా చిత్రం ఇండియన్-2 కాగా, ఈ సినిమాకి ప్రస్తుతం శంకర్ దర్శకత్వం వహిస్తున్నారు. ఈ మేరకు ఇండియన్-2 చిత్రం తాజా షెడ్యూల్ షూటింగును కడప జిల్లా జమ్మలమడుగు వద్ద గండికోటలో ఏర్పాటు చేశారు. దాంతో, షూటింగ్ నిమిత్తం కమల్ గండికోట వచ్చారు. షూటింగ్ స్పాట్ వద్ద సందడి వాతావరణం కనిపించింది.
తనకోసం వచ్చిన ప్రజలకు కమల్ అభివాదం చేశారు. కాగా, గండికోట వద్ద ఈ చిత్రం 6 రోజుల పాటు షూటింగ్ జరుపుకోనుంది. గతంలో వచ్చిన భారతీయుడు చిత్రం ఎంత పెద్ద హిట్టో ప్రత్యేకంగా చెప్పనక్కర్లేదు. ఈ చిత్రానికి సీక్వెల్ గా వస్తున్న ఇండియన్-2 చాలాకాలం క్రితమే ప్రారంభం అయినా, పలు కారణాలతో ఆలస్యం అయింది. కమల్ రాకతో అక్కడ భారీ కోలాహలం నెలకొంది. ఆయనను చూసేందుకు సమీప గ్రామాల నుంచి ప్రజలు పెద్ద ఎత్తున తరలివచ్చారు.
