కాంగ్రెస్ పార్టీకి రాజీనామా చేసిన తర్వాత పాటీదార్ ఉద్యమ నాయకుడు హార్ధిక్ పటేల్ ఆ పార్టీపై విరుచుకుపడుతున్నారు. గుజరాత్ కాంగ్రెస్ పార్టీలో కీలకంగా ఉన్న హర్ధిక్ పటేల్ రాజీనామా చేయడం చర్చనీయాంశం అయింది. రాజీనామా తరువాత ఆయన కాంగ్రెస్ పార్టీపై తీవ్ర విమర్శలు చేస్తున్నారు. కాంగ్రెస్ పార్టీ భగవాన్ శ్రీరాముడిని ఎందుకు అంతగా ద్వేషిస్తుందని ప్రశ్నించారు. రామ మందిర ఇటుకలపై కుక్క మూత్ర విసర్జన చేస్తుందని గుజరాత్ కాంగ్రెస్ నేత అనడంతో హార్ధిక్ పటేల్ ఘాటుగా స్పందించారు. ప్రజలు మనోభావాలను దెబ్బతీసేందుకు కాంగ్రెస్ పార్టీ పనిచేస్తుందని… హిందువుల మత విశ్వాసాలను దెబ్బతియడానికి ప్రయత్నిస్తుందంటూ ఆయన విమర్శించారు. 
