ప్రస్తుతం తెలుగు చిత్ర పరిశ్రమలోనే కాదు, ఉత్తరాదిలోనూ సంచలన విజయంతో దూసుకుపోతోంది ‘కార్తికేయ2’. చిన్న చిత్రంగా విడుదలై బాక్సాఫీస్‌ వద్ద కాసుల వర్షాన్ని కురిపిస్తోంది. నిఖిల్ కథానాయకుడిగా చందూ మొండేటి దర్శకత్వంలో తెరకెక్కిన ఈ సినిమా ఇటీవల ప్రేక్షకుల ముందుకు వచ్చింది.
ఈ క్రమంలో ‘కార్తికేయ సిరీస్‌లో మరిన్ని సీక్వెల్స్ వస్తాయని హీరో నిఖిల్ అన్నారు. ఓ ఆంగ్ల న్యూస్‌ ఏజెన్సీకి ఇచ్చిన ఇంటర్వ్యూలో అనేక విషయాలను పంచుకున్నారు. కార్తికేయ సిరీస్‌లో మూడో భాగం ఉంటుందా? అని ప్రశ్నించగా, ‘కచ్చితంగా ఉంటుంది. సాహసాలను, సమస్యలను , మిస్టరీలను ఛేదించే ఉత్సాహం ఉన్న డాక్టర్‌ కార్తీక్‌ పాత్ర కొనసాగుతూనే ఉంటుంది. మన దేశ సంస్కృతిలో ఎవరికీ తెలియని ఎన్నో కథలు ఉన్నాయి. వాటిని స్ఫూర్తిగా తీసుకుని మరిన్ని భాగాలతో మీ ముందుకు వస్తాం’ అని నిఖిల్ చెప్పుకొచ్చారు.
”ప్రస్తుతం మా సినిమాకు వస్తున్న ఆదరణను అస్సలు ఊహించలేదు. మా టీమ్‌ మొత్తం ఆశ్చర్యపోతోంది. ఇప్పటికే అనేక చోట్ల షోలు పెరిగాయి. థియేటర్‌ల సంఖ్య గణనీయంగా పెరిగింది. అన్నీ హౌస్‌ఫుల్‌ కలెక్షన్లతో నడుస్తున్నాయి. థియేటర్‌లో మా సినిమా చూసి, మమ్మల్ని సపోర్ట్‌ చేస్తున్న అందరికీ కృతజ్ఞతలు. ఎందుకంటే హిందీలో తొలిరోజు కేవలం 50 స్క్రీన్‌లలోనే విడుదల చేశాం. ఇప్పుడు ఆ సంఖ్య 1000కు పెరిగింది. రోజుకు 3000 ప్రదర్శనలు అవుతున్నాయి. ఈ వారంలో అది మరింత పెరిగే అవకాశం ఉందని భావిస్తున్నా. భారతీయ ప్రజలకు శ్రీకృష్ణుడు ఇచ్చిన వారసత్వ సంపదను బాధ్యతతో ముందుకు తీసుకొచ్చాం. కృష్ణతత్వంపై మా స్థాయిలో పరిశోధన చేసి, ఈ సినిమాను తీర్చిదిద్దాం”
– నిఖిల్, హీరో
ఆగస్టు 13న విడుదలైన ‘కార్తికేయ2’ బాలీవుడ్‌లో కలెక్షన్లతో దూసుకుపోతోంది. తొలి రోజు 50 థియేటర్‌లలో విడుదలైన ఈ సినిమా ఇప్పుడు దాదాపు 1500లకు పైగా స్క్రీన్‌లపై ప్రదర్శితమవుతోంది. ఈ చిత్ర థియేట్రికల్ హక్కులను రూ.14 కోట్లకు విక్రయించగా, తొలి వారంలోనే డబుల్‌ షేర్‌ రాబట్టింది. దీన్ని బట్టి ఈ చిత్రం ఎంత పెద్ద హిట్టో అర్థం చేసుకోవచ్చు.
భారతదేశంలోనే కాదు, అమెరికాలోనూ ఈ చిత్రం మంచి వసూళ్లను రాబడుతోంది. యూఎస్‌ బాక్సాఫీస్‌ వద్ద 1మిలియన్‌ డాలర్లను వసూలు చేసినట్లు కథానాయకుడు నిఖిల్ స్వయంగా వెల్లడించారు. అమెరికాలోని సినిమా ప్రేమికులకు కృతజ్ఞతలు తెలిపారు. ఇక ప్రపంచవ్యాప్తంగా ఈ చిత్రం ఇప్పటివరకూ రూ.75కోట్లు వసూలు చేసినట్లు చిత్ర బృందం వెల్లడించింది. రూ.100కోట్ల వైపు పరుగులు పెడుతున్నట్లు చెప్పుకొచ్చింది.
చందూ మొండేటి దర్శకత్వం వహించిన ఈ చిత్రంలో బాలీవుడ్‌ నటుడు అనుపమ్‌ ఖేర్‌తో పాటు హాస్య నటులు శ్రీనివాసరెడ్డి, వైవా హర్ష తదితరులు నటించారు. కృష్ణతత్వాన్ని బోధిస్తూ మిస్టరీ థ్రిల్లర్‌గా ‘కార్తికేయ2’ తెరకెక్కింది
