హైదరాబాద్‌లో ఉదయం నుంచి కొనసాగిన ఎన్‌ఫోర్స్‌మెంట్ డైరెక్టరేట్ (ఈడీ) సోదాలు ముగిశాయి. భూదాన్ భూముల వ్యవహారంలో భాగంగా నగరంలోని 13 ప్రాంతాల్లో ఈడీ అధికారులు విస్తృతంగా తనిఖీలు నిర్వహించారు. ఈ సోదాల్లో ప్రముఖ వ్యాపారవేత్త మునావర్ ఖాన్ ఇల్లు, కార్యాలయాలు, అలాగే ఆయన బంధువుల నివాసాలు కూడా ఉన్నాయి. ఈడీ అధికారులు మునావర్ ఖాన్‌కు చెందిన ఏకంగా 40 వింటేజ్ కార్లను సీజ్ చేయడం సంచలనం సృష్టించింది. అంతేకాకుండా, మునావర్ నివాసంలో భారీగా భూదాన్ భూములకు సంబంధించిన కీలక పత్రాలను స్వాధీనం చేసుకున్నారు. మునావర్ నిర్వహించిన భూ లావాదేవీలకు సంబంధించిన డాక్యుమెంట్లను కూడా ఈడీ అధికారులు సీజ్ చేశారు.
ఈడీ ప్రాథమికంగా గుర్తించిన సమాచారం ప్రకారం, మునావర్ ఖాన్ వందల ఎకరాల భూదాన్ భూములను అక్రమంగా కబ్జా చేసి, వాటిని రియల్టర్లకు, ప్రభుత్వ అధికారులకు విక్రయించినట్లు ఆరోపణలు ఉన్నాయి. ఈ వ్యవహారంలో పెద్ద ఎత్తున అవినీతి, అక్రమాలు జరిగినట్లు ఈడీ అనుమానిస్తోంది. ఉదయం నుంచి పలు బృందాలుగా విడిపోయిన ఈడీ అధికారులు ఏకకాలంలో 13 ప్రాంతాల్లో సోదాలు నిర్వహించారు. ఈ సోదాల్లో భూముల క్రయవిక్రయాలకు సంబంధించిన కీలక ఆధారాలు లభ్యమైనట్లు తెలుస్తోంది. సీజ్ చేసిన పత్రాలను, వింటేజ్ కార్లను ఈడీ అధికారులు క్షుణ్ణంగా పరిశీలించనున్నారు.
భూదాన్ యజ్ఞం ద్వారా పేదలకు పంపిణీ చేయాల్సిన భూములను కొందరు వ్యక్తులు అక్రమంగా సొంతం చేసుకున్నారనే ఆరోపణలపై ఈడీ దృష్టి సారించింది. మునావర్ ఖాన్ ఈ వ్యవహారంలో కీలక సూత్రధారిగా అనుమానిస్తున్నారు. రానున్న రోజుల్లో ఈ కేసులో మరిన్ని అరెస్టులు, కీలక విషయాలు వెలుగులోకి వచ్చే అవకాశం ఉంది.
