డ్రాగన్ దేశం చైనాకు గట్టి షాక్ తగిలింది. తమ భూభాగంలో ఎలాగైనా కలిపేసుకోవాలనుకుంటున్న తైవాన్ దేశ అధ్యక్ష ఎన్నికల్లో అధికార డెమొక్రాటిక్‌ ప్రోగ్రెసివ్‌ పార్టీ (డీపీపీ) మూడోసారి విజయకేతనం ఎగురవేసింది. ఆ పార్టీ తరఫున అధ్యక్ష ఎన్నికల బరిలో నిలిచిన తైవాన్ ఉపాధ్యక్షుడు లాయ్‌ చింగ్‌ తె ఈ ఎన్నికల్లో ఘన విజయం సాధించారు. ఆయనతో తలపడిన ప్రతిపక్ష పార్టీల నేతలు కువోమింగ్‌ తాంగ్‌ పార్టీకి చెందిన హు యు ఇయ్‌, తైవాన్ పీపుల్స్‌ పార్టీకి చెందిన కోవెన్‌ జి ఓటమి పాలయ్యారు. శనివారం ఉదయం 8 గంటల నుంచి ప్రారంభమైన పోలింగ్‌ సాయంత్రం 4 గంటలకు ముగిసింది. అనంతరం ఓట్ల లెక్కింపు జరగ్గా రాత్రి వరకు ఫలితాలు వెల్లడయ్యాయి.
రాబోయే నాలుగేళ్లలో చైనాతో సంబంధాలను నిర్దేశించే ఎన్నికలు కావటంతో తైవాన్ ప్రజలు అధికార డీపీపీ వైపు మళ్లీ మొగ్గు చూపినట్లు సమాచారం. అధికార పక్షం-డీపీపీ తరఫున అధ్యక్ష బరిలో నిలిచిన లాయ్‌ చింగ్‌ తెను చైనా వ్యతిరేకించింది. అంతే కాకుండాయుద్ధం కావాలా లేక శాంతి కావాలా తేల్చుకోవాలంటూ హెచ్చరించింది. అయితే తైవాన్ ప్రజలు చైనా హెచ్చరికలను ఏ మాత్రం పట్టించుకోలేదు. డ్రాగన్ వార్నింగ్ను నిర్ధ్వందంగా తోసిపుచ్చిన తైవాన్ ప్రజలు అధికార పార్టీకే పగ్గాలు కట్టాలని నిర్ణయించినట్లు ఎన్నికల ఫలితాలు చాటుతున్నాయి. తైవాన్ తమ దేశంలో అంతర్భాగమన్న చైనా వాదనను ప్రస్తుత అధ్యక్షురాలుత్సాయ్‌ యింగ్‌ వెన్‌ తోసిపుచ్చిన విషయం తెలిసిందే.
