లండన్ నుంచి ముంబయికి రావాల్సిన విమానం తుర్కియేలో ఎమర్జెన్సీ ల్యాండ్ అయింది. బుధవారం రాత్రి నుంచి 200 మంది భారత ప్రయాణికులు అక్కడి మారుమూల ఎయిర్ పోర్టులో చిక్కుకుపోయారు. లండన్ నుంచి ముంబయికి బయల్దేరిన వర్జిన్ అట్లాంటిక్ విమానం మెడికల్ ఎమర్జెన్సీ కారణంగా తుర్కియేలోని మారుమూల ప్రాంతంలోని దియార్‌బకిర్ ఎయిర్‌పోర్టులో ల్యాండ్ అయింది.
ఆ సమయంలో సాంకేతిక సమస్య తలెత్తడంతో దాదాపు 20 గంటలుగా ప్రయాణికులు అక్కడే చిక్కుకుపోయారు. అందులో 200 మందికిపైగా భారతీయులున్నారని జాతీయ మీడియా కథనాలు వెల్లడించాయి. తిరిగి వారు ఎప్పుడు గమ్యస్థానం చేరతారనే దానిపై మాత్రం క్లారిటీ లేదు. ప్రత్యామ్నాయ ఏర్పాట్ల గురించి విమానయాన సంస్థ ఎలాంటి ప్రకటన చేయలేదు. త్వరగా రవాణా ఏర్పాటు చేయాలని ప్రయాణికులు సంబంధిత అధికారులను కోరారు. తమకు విమానాశ్రయంలో తగిన సౌకర్యాలు లేవని తెలిపారు. తామున్న ప్రాంతం మిలిటరీ బేస్ కావడంతో అక్కడి నుంచి బయటకు వెళ్లడానికి కూడా లేదని త్వరగా సాయం చేయాలని విజ్ఞప్తి చేశారు.
