హమాస్ను సమూలంగా అంతం చేసేందుకు కంకణం కట్టుకున్న ఇజ్రాయెల్ గాజాపై ముప్పేట దాడులు చేస్తోంది. ఈ దాడుల్లో ఎంతో మంది అమాయక ప్రజలు ప్రాణాలు కోల్పోతున్నారు. ముఖ్యంగా చిన్నారులు, మహిళలు పిట్టల్లా రాలిపోతున్నారు. ఈ నరమేధాన్ని ప్రపంచ దేశాలు ముక్తకంఠంతో ఖండిస్తున్నాయి. తాజాగా ఈ యుద్ధంపై కెనడా ప్రధాని జస్టిన్ ట్రూడో స్పందించారు. ఈ యుద్ధం వల్ల గాజాలో ఎంతో మంది చిన్నారులు, మహిళలు చనిపోతున్నారని ఆవేదన వ్యక్తం చేశారు. తాజాగా స్థానిక మీడియాకు ఇచ్చిన ఇంటర్వ్యూలో ఇజ్రాయెల్పై గాజా యుద్ధాన్ని ట్రూడో తప్పుబట్టారు.
గాజాపై ఇజ్రాయెల్ మారణకాండను ప్రపంచమంతా చూస్తోందని ట్రూడో అన్నారు. ఇజ్రాయెల్ కాస్త సంయమనం పాటించి గాజాపై దాడులు ఆపాలని కోరారు. దయచేసి ఈ నరమేధాన్ని ఆపాలని ఇజ్రాయెల్కు ట్రూడో విజ్ఞప్తి చేశారు. మరోవైపు హమాస్ను ఉద్దేశించి.. యుద్ధంలో అమాయక పాలస్తీనా ప్రజలను అడ్డు పెట్టుకుని ఉగ్రవాదులు రక్షణ పొందడం సరికాదని హితవు పలికారు. బందీలుగా ఉన్న ఇజ్రాయెల్ పౌరులను వెంటనే విడిచి పెట్టాలని హమాస్ను కోరారు. ట్రూడో వ్యాఖ్యలపై ఇజ్రాయెల్ ప్రధాని బెంజమిన్‌ నెతన్యాహు స్పందించారు. తమ పౌరులపై హమాస్ జరిపిన మారణహోమాన్ని ఎక్స్ వేదికగా ఆయన గుర్తు చేశారు.
