వైద్య శాస్త్రంలో చేసిన కృషికి కాటలిన్ కరికో, డ్రూ వెయిస్‌మన్‌కు ఈ ఏడాది అత్యంత ప్రతిష్టాత్మక నోబెల్ పురస్కారం-2023 లభించింది. కరోనాను ఎదుర్కొనేందుకు సమర్థమైన ఎంఆర్ఎన్ఏ వ్యాక్సిన్ల అభివృద్ధిలో న్యూక్లియోసైడ్‌ బేస్‌కు సంబంధించిన ఆవిష్కరణలకు వీరిని ఈ అవార్డు వరించింది. స్వీడన్‌లోని స్టాక్‌హోంలో ఉన్న కరోలిన్‌స్కా ఇన్‌స్టిట్యూట్‌లోని నోబెల్ కమిటీ ఇవాళ నోబెల్ బహమతులను పొందిన వారి జాబితాను వెల్లడించింది.
కాటలిన్ కరికో.. హంగేరీలోని సాగన్ విశ్వవిద్యాలయంలో ప్రొఫెసర్‌గా, పెన్సిల్వేనియా విశ్వవిద్యాలయంలో అనుబంధ ప్రొఫెసర్‌గా కొనసాగుతున్నారు. కరికో, వెయిస్‌మన్‌ కలిసి పెన్సిల్వేనియా విశ్వవిద్యాలయంలో ఎంఆర్ఎన్ఏ వ్యాక్సిన్లపై పరిశోధనలు చేశారు. కొవిడ్-19ను ఎదుర్కొని కోట్లాది మంది ప్రాణాలను కాపాడటానికి ఈ ఎంఆర్ఎన్ఏ టీకాలు ఎంతగానో ఉపకరించాయి.
‘కొవిడ్‌ను ఎదుర్కొనేందుకు సమర్థమైన ఎంఆర్ఎన్ఏ వ్యాక్సిన్ల అభివృద్ధికి శాస్త్రవేత్తలు కాటలిన్ కరికో, డ్రూ వెయిస్‌మన్‌ దోహదపడ్డారు.’ అని నోబెల్ బృందం పేర్కొంది. వైద్య శాస్త్రంలో నోబెల్ విజేతలను థామస్ పెర్లమాన్ ప్రకటించారు. విజేతలను ప్రకటించడానికి కొద్దిసేపటి ముందే వారిని కలిసి.. నోబెల్ బహుమతి వరించిందని చెప్పగా వారు ఆనందంతో పొంగిపోయారని అన్నారు.
