ఇన్ఫోసిస్ వ్యవస్థాపకుడు నారాయణమూర్తి సతీమణి, సమాజ సేవకురాలు సుధామూర్తి తన కుమార్తె అక్షతామూర్తి గురించి ఇంట్రెస్టింగ్ కామెంట్స్ చేశారు. అక్షతనే తన భర్త రిషి సునాక్ను ప్రధాన మంత్రిని చేసిందని ఆమె అన్నారు. రిషి సునాక్ త్వరగా అధికారంలోకి వచ్చారని.. అయితే అది తన కుమార్తె వల్లే సాధ్యమైందంటూ వ్యాఖ్యలు చేశారు సుధామూర్తి.
“నేను నా భర్తను ఓ వ్యాపారవేత్తగా చేశాను. నా కుమార్తె తన భర్తను బ్రిటన్ ప్రధానిని చేసింది. కారణం భార్య మహిమలే. భర్తను ఓ భార్య ఎలా మార్చగలదో చూడండి.. నేను మాత్రం నా భర్తను మార్చలేకపోయాను. నేను నా భర్తను వ్యాపారవేత్తను చేస్తే, నా కుమార్తె మాత్రం తన భర్తను బ్రిటన్ ప్రధానిని చేసింది” అని ఆమె అంటున్న వీడియో ఇన్స్టాగ్రామ్లో చక్కర్లు కొడుతోంది.
‘మా ఇంట్లో ఏది ప్రారంభించినా గురువారం రోజునే ప్రారంభిస్తాం. అది చూసి రిషి ఓ రోజు అక్షతను అడిగారు. ఎందుకలా.. అని. దానికి మా కూతురు మేం రాఘవేంద్ర స్వామిని ఆరాధిస్తామని చెప్పింది. అప్పటి నుంచి రిషి కూడా ప్రతి గురువారం ఉపవాసం ఉంటున్నారు.’ అని ఈ వీడియోలో సుధామూర్తి చెప్పుకొచ్చారు.
