టీచ‌ర్ పై వీడియోలు వైరల్ చేయ‌డంపై నారా లోకేష్ స్పందించారు. ఎంతో బాధ్యతాయుతంగా పని చేస్తూ విద్యార్ధులను భావి భారత పౌరులుగా తీర్చిదిద్దుతున్న ఉపాధ్యాయులను అతి నీచంగా చిత్రీకరిస్తూ వారి ఆత్మస్థైర్యాన్ని దెబ్బతీసే విధంగా ప్రవర్తిస్తున్న వైకాపా చర్యల్ని నేను తీవ్రంగా ఖండిస్తున్నానని ఫైర్ అయ్యారు. ఫేక్ హ్యాండిల్స్ ద్వారా ఫేక్ విషయాలను ప్రచారం చేసే వైకాపా చర్యల్ని అర్ధం చేసుకుని తగిన రీతిలో స్పందించాల్సిందిగా టీచర్లను కూడా కోరుతున్నానని ట్వీట్ చేశారు నారా లోకేష్.
వైకాపా తన ఫేక్ హ్యాండిల్ లో నేడు ఒక ఫొటోను షేర్ చేసిందని… ఆంధ్రప్రదేశ్ లో పని చేస్తున్న టీచర్లు తాగి బెంచిల కింద పడుకుంటున్న రీతిలో అతి జుగుప్సాకరంగా అందులో వ్యాఖ్యానం ఉందని ఆగ్రహించారు. ఎక్కడో పక్క రాష్ట్రంలో ఏదో ఒక సందర్భంలో బయటకు వచ్చిన ఫొటోను ఆంధ్రప్రదేశ్ లో జరిగినట్లు చెప్పడం, దానిపై దారుణంగా వ్యాఖ్యానించడం క్షమించరాని నేరం అని మండిప‌డ్డారు. ఇలాంటి నేరాలను ఇప్పటికే చాలా సార్లు వైకాపా చేసింది. విద్యా నేర్పే గురువుల పట్ల కూడా అతి నీచంగా వ్యవహరించిన వైకాపా నీతిబాహ్యమైన చర్యల్లో మరో మెట్టు కిందికి దిగజారిందన్నారు నారా లోకేష్.
