పదేళ్ల వయసున్న పిల్లల నుంచి పండు ముసలివాళ్ల వరకు ఇటీవల గుండెపోటుతో మరణిస్తున్న వారి సంఖ్య పెరుగుతోంది. ముఖ్యంగా టీనేజ్ పిల్లలు, యువత ఎక్కువగా గుండెపోటు బారిన పడుతున్నారు. ప్రతిరోజూ వ్యాయామం చేస్తూ ఫిట్గా ఉన్న వారు కూడా హార్ట్ అటాక్కు గురవుతున్నారు. అయితే గుండెపోటుకు గురైన వారికి సమయానికి సీపీఆర్ అందిస్తే బతికే అవకాశం ఎక్కువ ఉంటుందని వైద్యులు చెబుతున్నారు. ఈ నేపథ్యంలో కేంద్ర సర్కార్ కీలక నిర్ణయం తీసుకుంది.
గుండెపోటు మరణాలు తగ్గించేందుకు చర్యలు ప్రారంచిన కేంద్ర సర్కార్.. ఇందులో భాగంగా దేశవ్యాప్తంగా సీపీఆర్ టెక్నిక్‌లో శిక్షణ ఇచ్చేందుకు ఒక కార్యక్రమాన్ని ప్రారంభించింది. కేంద్ర ఆరోగ్య శాఖ మంత్రి మన్‌సుఖ్ మాండవీయ ఇవాళ ఈ శిక్షణా కార్యక్రమాన్ని ప్రారంభించారు. దేశవ్యాప్తంగా అమలు కానున్న ఈ కార్యక్రమంలో భాగంగా సుమారు 10 లక్షల మందికి సీపీఆర్‌లో శిక్షణ ఇవ్వనున్నట్లు కేంద్ర మంత్రి తెలిపారు. గుర్తింపు పొందిన వెయ్యికి పైగా వైద్యకేంద్రాల ద్వారా ఈ శిక్షణ అందుతుందని చెప్పారు. జిమ్‌లో పనిచేసేవారూ ఈ శిక్షణలో భాగమవుతారని వెల్లడించారు.
