సెంట్రల్‌ కేరళలోని త్రిస్సూర్‌ జిల్లా కురియాచిరా పట్టణానికి చెందిన సెయింట్‌ జోసెఫ్‌ చర్చికి వెళ్లిన వారెవరైనా అక్కడ ఓ సమాధిని చూసి కాసేపు అక్కడే ఆగిపోతారు. ఎందుకంటే ఆ సమాధి పలకపై పెద్ద సైజులో ఉన్న ఓ క్యూఆర్ కోడ్ ఉంటుంది. దాన్ని చూసి చాలా మంది అక్కడే ఆగి విస్తుపోతున్నారు. ఆ క్యూఆర్ కోడ్ స్కాన్ చేసి చూసిన తర్వాత ఆశ్చర్యపోతున్నారు. అందులో ఉన్న వివరాలు చూసి ఎమోషనల్ అవుతున్నారు.
26 ఏళ్ల వయసులో అకాల మరణానికి గురైన యువ వైద్యుడు ఐవిన్‌ ఫ్రాన్సిస్‌ సమాధి అది. ఈ కోడ్‌ను స్కాన్ చేస్తే.. డాక్టర్‌ ఐవిన్‌ జీవిత విశేషాలు, అతడి సృజనాత్మక ప్రతిభ తాలూకు వీడియోలు చూడవచ్చు. వైద్యుడిగా ఎంతో భవిష్యత్తు ఉన్న కుమారుడు చిన్న వయసులోనే తమకు దూరం కావడంతో తల్లడిల్లిన తల్లిదండ్రులు ఐవిన్‌ జ్ఞాపకాలు సజీవంగా ఉండాలన్న తలంపుతో ఈ ఏర్పాటు చేశారు.
డాక్టర్‌ ఐవిన్‌ జీవితంలోని ముఖ్య ఘట్టాలతో ఓ వెబ్‌ పేజీ రూపొందించిన అతడి కుటుంబం క్యూఆర్ కోడ్‌తో దాన్ని అనుసంధానం చేసింది. ఈ కోడ్‌ను స్కాన్ చేస్తే ఐవిన్‌ చిత్రాలు, కళాశాలలో కీబోర్డు, గిటార్లతో ఇచ్చిన ప్రదర్శనలు, మిత్రుల వివరాలు అన్నీ చూడవచ్చు. 2021లో బ్యాడ్మింటన్‌ ఆడుతూ కుప్పకూలిపోయిన డాక్టర్‌ ఐవిన్‌ తల్లిదండ్రులకు తీరని దుఃఖాన్ని మిగిల్చాడు.
