ఉగ్రవాదంపై ప్రధాన మంత్రి నరేంద్ర మోదీ మరోసారి విరుచుకుపడ్డారు. ఉగ్రవాదానికి సహకరిస్తున్న దేశాలపై ఆయన ఘాటు వ్యాఖ్యలు చేశారు. ఉగ్రవాదానికి మద్దతు ఇస్తున్న దేశాలను విమర్శించడానికి షాంఘై సహకార సంస్థ- ఎస్సీఓ దేశాలు ఏ మాత్రం వెనకాడకూడదని ప్రధాని మోదీ అన్నారు. ఉగ్రవాద కార్యకలాపాలను ఎదుర్కోవడంలో ఎలాంటి ద్వంద్వ వైఖరి ఉండకూడదని స్పష్టం చేశారు. ఉగ్రవాదానికి మద్దతిచ్చే దేశాలను విమర్శించడానికి ఏ మాత్రం వెనకాడొద్దని.. పరోక్షంగా పాకిస్థాన్ ను ఉద్దేశించి ప్రసంగించారు.
“ఆఫ్గనిస్థాన్‌లోని పరిస్థితి ఎస్సీఓ దేశాల భద్రతపై ప్రత్యక్ష ప్రభావాన్ని చూపింది. ఆఫ్గనిస్తాన్‌కు సంబంధించి భారతదేశం ఆందోళనలు, అంచనాలు చాలా ఎస్సీఓ సభ్య దేశాల మాదిరిగానే ఉన్నాయి. పొరుగు దేశాలలో అశాంతిని వ్యాప్తి చేయడానికి లేదా తీవ్రవాద భావజాలాన్ని ప్రోత్సహించడానికి ఆఫ్గనిస్థాన్‌ను ఎవరూ ఉపయోగించకుండా చూడాలి.”
– నరేంద్ర మోదీ, భారత ప్రధానమంత్రి
వర్చువల్ విధానంలో జరిగిన షాంఘై సహకార సంస్థ సదస్సు- ఎస్సీఓ సమావేశానికి ప్రధాని అధ్యక్షత వహించారు. పాకిస్థాన్ ప్రధాని షెహబాజ్ షరీఫ్, చైనా అధ్యక్షుడు జిన్‌పింగ్, రష్యా అధ్యక్షుడు పుతిన్‌లు వింటుండగా ప్రధాని ఈ వ్యాఖ్యలు చేయడం ప్రాధాన్యం సంతరించుకుంది.
