బాలీవుడ్ స్టార్ హీరో విక్కీ కౌశల్‌, నేషనల్ క్రష్ రష్మిక మందన్న ప్రధాన పాత్రల్లో నటించిన లేటెస్ట్ సినిమా ఛావా. లక్ష్మణ్ ఉటేకర్ తెరకెక్కించిన ఈ సినిమా ఫిబ్రవరి 14వ తేదీన రిలీజైన సూపర్ హిట్ టాక్ తెచ్చుకుంది. ఈ సినిమాకు వచ్చిన ఆదరణతో తెలుగులోనూ రిలీజ్ చేయాలనే డిమాండ్లు వెల్లువెత్తాయి. ఈ క్రమంలో గీతా ఆర్ట్స్ ఈ మూవీని తెలుగులో రిలీజ్ చేసింది. అటు బాలీవుడ్, ఇటు టాలీవుడ్ లలో సూపర్ హిట్ కలెక్షన్లతో దూసుకెళ్తోంది.
మరాఠా యోధుడు శంభాజీ మహారాజ్ జీవిత కథ ఆధారంగా రూపొందిన ‘ఛావా’ సినిమాను పార్లమెంట్లో ప్రదర్శించనున్నట్లు సమాచారం. పార్లమెంట్ లోని బాలయోగి ఆడిటోరియంలో గురువారం రోజున ఈ మూవీ స్పెషల్ స్క్రీనింగ్ ఉండనున్నట్లు తెలిసింది. ప్రధానమంత్రి నరేంద్ర మోదీ తోపాటు కేంద్ర మంత్రులు, ఎంపీలు ఈ చిత్రాన్ని వీక్షించనున్నట్లు సమాచారం. ఈ నేతలతో పాటు ఛావా చిత్రబృందం కూడా ఈ స్క్రీనింగుకు హాజరు కానున్నట్లు సమాచారం. దీనిపై అధికారిక ప్రకటన రావాల్సి ఉంది.
