ఉత్తర్ ప్రదేశ్ కాన్పూర్లోని ఓ ప్రభుత్వ ఆస్పత్రి వైద్యుడు రోగులకు వినూత్నంగా చికిత్స అందిస్తున్నారు. గుండె సంబంధిత రోగాలకు చికిత్స చేసే వైద్యుడు నీరజ్.. ఈ రోగాల్లో ఒత్తిడి చాలా ముఖ్యమైన అంశమని.. అందుకే హృద్రోగ రోగుల్లో ఒత్తిడి తగ్గించడమనేది చాలా ప్రాధాన్యమైన అంశమని తెలిపారు. అందుకే ఆయన రామాయణం, హనుమాన్ చాలీసా లాంటి పుస్తకాలతో గుండె వైద్యం చేస్తున్నారు. వీటిని చదివిన రోగుల ఆరోగ్యం మెరుగుపడినట్లు చెబుతున్నారు. ఓ వైపు మందులతో రోగులకు చికిత్స అందిస్తూనే, మరోవైపు ఇలాంటి మత గ్రంథాల సాయాన్ని తీసుకుంటున్నామని చెప్పారు నీరజ్. వీటని చదవడం వల్ల వారికి ఏకాగ్రత కుదిరి.. ఒత్తిడి తగ్గుతోందని మనసు ప్రశాంతంగా ఉంటుందని వివరించారు.
“గుండె సంబంధిత సమస్యతో ఓ రోగి ఆస్పత్రికి వచ్చాడంటే ఏమవుతుందోనని వారికి భయంగా ఉంటుంది. ఆ భయం కాస్త పెరిగి తీవ్ర మానసిక ఒత్తిడికి దారి తీస్తుంది. అప్పటికే శారీరకంగా ఇబ్బందులు ఎదుర్కొంటున్న రోగులు మానసికంగానూ అనారోగ్యానికి గురవుతారు. అది గుండెకు చాలా చేటు చేస్తుంది. ఇలాంటి కండిషన్లో ఉన్న రోగులకు ఒకప్పుడు మానసిక థెరపీతో పాటు మ్యూజిక్ థెరపీ చేయించేవాళ్లం. కానీ క్రమంగా దాని ప్రభావం కూడా తగ్గిపోయింది. అందుకే ఇప్పుడు మతగ్రంథాలను ఎంచుకున్నాం. దేవుడిపై నమ్మకంగా ఉండే వారికి ఈ గ్రంథాలను చదవమని చెబుతున్నాం. వారు అలా ఆ పుస్తకాలు చదువుతూ ఏకాగ్రత కుదిరి మానసకి ప్రశాంతతను పొందుతున్నారు. దీనివల్ల మానసిక ఆరోగ్యంతో పాటు శారీరకంగానూ వారు ఆరోగ్యవంతులవుతున్నారు. ” – నీరజ్, సీనియర్ కార్డియాలజిస్ట్
